No.47/2021-2022

06.04.2021: Ruihhlo avanga harsatna tawkte chhanchhuahna leh tanpuina hmunpui Jordan Centre, Sethawn chu vawiin khan Chief Minister Pu Zoramthanga chuan khuallian niin a hawng. Social Welfare Minister Dr. K. Beichhua chu khualzahawm a ni.

Chief Minister chuan zu leh ruihhloin a tihbuaite chhanchhuah chu hna pawimawh ber pakhat a nih thu a sawi a. Nu leh pa te lungmuang zawka an awm theih nan te, ruihhlo bawiha tang te chhanchhuaha, enkawl dam bakah an intundin theihna tur eizawnna tham thiam thil inzirtirna te pek chu Jordan Centre hian a thil tum a nih thu a sawi a. Hemi atan hian sawrkar pawhin theihtawp chhuahin, kum 2019 kumtir atang khan hma lain, a bultanna atan SEDP atangin cheng vbc 10 ruahman a nih thu te a sawi a. Rokhawlhna hrang hrang avangin beisei angin hmalak lawk theih loh mahse vawiina centre hi hawn a ni thei chu lawmawm a tih thu a sawi.

Chief Minister chuan Jordan Centre-a awmte hi mithiamte kaihhruaiin enkawla, taksa mai nilo thlarau damna kawnga kaihruaiin, infiamna hmun tha te siam sak an nih tur thu te sawiin, Mizoram pum bakah state pawn atang te pawha chhim theih tur khawpa enkawlna tha peka, a tul ang zela tihlen leh thawm that zel chu rilruah a awm thu a sawi. Heng zawng zawng atan hian sawrkar kutah chauh a awm theihloh thu sawiin, mipui, kohhran leh tlawmngai pawl an tan ho a, a thawhho a pawimawh thu a sawi bawk.

Social Welfare Minister Dr. K. Beichhua chuan taksa leh rilru a dam kawp hi hriselna dik tak chu a nih thu sawiin, Jordan Centre chu chutianga enkawlna pe tura ruahman a nih thu a sawi bawk a. Ruahman danin leh, staff beisei an hmuh kim vek hnuah chuan, ruihhlo bawiha tang te hi an ruihhlo ngaih bakah natna dang hrang hrangin a tlak buak tel te an nih thin avangin he centre-a enkawl tura lo lut te hi a tirah screening tih vek phawta, an natna neih te enkawl dam leh detoxification kalpui kawp emaw, a tahtawla enkawlna kalpui a nih tur thu te a sawi a. He centre-a thawktu honorary worker lakte hi hna ropui tak, mahse hautak tak thawk tur an nih avangin rawngbawlna rilru puin, tuarchhel taka thawk turin a chah bawk a ni.

Ruihhlo avanga harsatna tawkte chhanchhuah leh enkawl hna hi 30.03.1990 khan din a lo ni tawh a ni. A tirah chuan Health Department kutah a awm a, kum 1993 tawp lamah khan Social Welfare Department hnenah hlan a ni a. “De-Addiction-cum-Rehabilitation Centre” tih hming puin District Jail, Armed Vengah kalpui thin a ni a, centre hmun tur atan Pu .H. Lianngura chuan Sethawna an ram chu pein, he mi hmunah hian “Ruihhlo ngai te enkawlna hmun” changtlung tak din a lo ni ta a ni. Helai hmun hi Kum 1998 atang khan hman tangkai zui a lo ni ta a ni. Chutichuan hun eng emaw chen atang khan centre kalphung hi her danglam niin, ruihhlo ngaite enkawlna lam chu chawlhsan rih a ni a. Ruihtheihthil ti thin sim tate thiam thil zirtirna, mahni kutkea ding tura zirtirna pek lamah a tul zawka hriatna a awm avangin hmalak a ni ta a, a hming pawh “After Care Centre” tia thlak danglam a ni.

Socio Economic Development Policy (SEDP) hnuaia Social Rehabilitation Board din, Minister, Social Welfare Department changtu chairman na hnuaiah Kohhran, NGO leh Department hrang hrang te thawh ho nain hmalakna hi tan nghal a ni. Mizoramah ruihhlo avanga harsatnain zual lam a pan zel avangin Board chuan heng ruihhlo ngaite tanpui dan tur ngaihtuahin he centre-ah hian hmalakna bul tan a ni a, a hmingah “Jordan Centre” ni se tiin 24 February 2019 khan Centre hming hi thlak a ni ta a ni.

Jordan Centre chuan Whole Person Recovery chu tum berah neiin, taksa rilru leh thlarauah damna pek chu a tum a ni. He thil tum tihhlawhtlin nan hian Medical treatment facility buatsaih niin, hospital tha tak buatsaih a ni a. He hmunah hian medical treatment tha tak pek a nih theih nan Doctor leh Nurse ruahman a ni.

Damlo ten rilru hrisel tak an put theih nan counseling programme chu case worker leh psychologist thiam tak tak te hnen atangin neih thin a ni anga, spiritual counseling leh gospel camping pawh Social Rehabilitation Board Spiritual Sub-committee hmalaknain neihpui thin an ni bawk dawn a ni.

Damlo ten rilru hrisel tak an put theih nan counseling programme chu case worker leh psychologist thiam tak tak te hnen atangin neih thin a ni anga, spiritual counseling leh gospel camping pawh Social Rehabilitation Board Spiritual Sub-committee hmalaknain neihpui thin an ni bawk dawn a ni. Jordan Centre Sethawnah hian detoxification leh rehabilitation programme kalpui tur a ni a, After Care Programme hi Thingdawlah neih tum a ni a, hmalakna hi kalpui mek zel a ni.

Jordan Centre-a mi 1000 leng tura thuam thatna atan hian SEDP hnuaiah Mizoram Sorkar chuan Rs.920.27 lakhs chu FY 2019-20 khan pek a ni a, a hnuaia tarlan ang hian hmalak tan nghal a nia, Finance Department (Budget Branch) atangin fund allocation hi December ni 9, 2019 khan hmuh a ni.

Rs.739 lakhs chu Civil Work hnathawh nana hman a ni a, he hnathawk tur hian Oriental Consultancy Services chu Tender hmangin ni 3 March 2020 khan State Level Consultancy Committee (SLCC) thukhawm chuan a thlang a ni a. Building 50-ah repair/renovation hna thawh a ni a, New construction hi 11 (sawm pakhat) neih a ni bawk a, reconstruction hi pahnih neih bawk a ni. Site Development( Earthwork and excavation) hi Thingdawlah neih a ni bawk a, Hume pipe phum a ni bawk. Rs.123.74 lakhs chu Jordan Centre atana bungrua lei (procurement) nana hman a ni a, bungrua suppliers te hi tender hmanga thlan an ni.

He mi bakah hian Rs.11,19,300 chu Water Connection siam nan PHE Department, Kolasib District-ah pek a ni a, Rs.19,33,118 chu 250 KVA Transformer sak nan P&E Department, Kolasib District-ah pek a ni bawk. Rs. 13,91,748 hi Jordan Centre, Sethawna service tur 407 Truck lei nan TATA Motors-ah hman a ni bawk.

Mizoram Sorkar atangin Jordan Centre-a mi 1000 lenga thuamthat a nih theihna tur Rs. 15,46,32,554 man project proposal Ministry of Social Justice & Empowerment ah thehluh a ni a. Central Ministry pawhin he dilna hi tha tiin National Action Plan for Drug Demand Reduction (NAPDDR) Scheme hnuaiah 1st installment Rs. 773.16 lakhs chu March 2020 khan sanction hmuh a ni.

MSJE atanga pawisa (Rs.773.16 lakhs) hmuh atang hian Jordan Centre-a hnathawk tur honorary workers lak tur atan hmalak nghal a ni a. Ni 13 November 2020 khan hna hrang hrang atana post ruak 161 hnawh khat nan advertisement chhuah a ni a, Result hi Ni 5 January 2021 khan tihchhuah a ni a, mi 147 lak an ni.

February thlatir atangin hna hi zawm tir an ni a. One day training/ Orientation course chu ni 8 February 2021 atangin ni 15 February 2021 khan honorary workers lak thar te leh staff awm sa te neihpui an ni.

MSJE hnuaia pawisa hmuh atang hian skill development programme changtlung tak buatsaih tum a ni a, hemi atan hian bungrua tam tak mamawh a ni a, hemi bungrua lei nan hian tender ni 3 March 2021 khan koh a ni a. Evaluation tih mek a ni a, State Purchase Advisory Committee hnena thlen turin buatsaih mek a ni.

Vawiin Jordan Centre hawnna inkhawm hi Pu K. Liantlinga, Social Rehabilitation Board Vice Chairman-in a kaihruai a, Social Welfare & Tribal Affairs Director Pi A. Vanlalzawni hnen atangin report ngaihthlak niin, Deputy Director Pi C. Zodinpuii chuan lawmthu sawiin hun a khar a ni. Jordan Centre-ah hian 30th May 2021 atangin Admission hawn tan tum a ni.

Minister hian Khamrang to Selesih kawng thar laih, PWD-in an thawh chu a en nghal bawk a ni.