No.48/2021-2022

Kolasib dated 7th April 2021: Vawiin chawhnu khan Kolasib District Level Task Force leh Zonal Executive Magistrate-ten Covid-19 hrileng dona kawnga VLTF-te nen rualkhai taka hmalakna kalpui a nih theih nan thutkhawmna an nei a, Dr.H.Lalthlangliana, Deputy Commissioner chuan thutkhawmna hi a kaihruai a ni.

Kolasib district huam chhung khaw hrang hranga Village Level Task Force-ten hripui leng kara inkaihhruaina dinglai chiang zawka an hmelhriatna turin Zonal Executive Magistrate-te kaltlanga inzirtirna pek dan turte, Covid-19 Vaccine chak zawka pekchhuah dan turte leh ramri a luhka hrang hranga endikna fimkhur tak a kalpui chhunzawm dan turte he thutkhawmnaah hian sawiho a ni a. Assam inthlannaa duty-a chhuak Mizoram Police lo haw turte dawnsawn dan tur leh endik dan turte ngaihthlak a ni bawk a ni. He hunah hian Zonal Execuitive Magistrate ni laite leh ruat tharte mawhphurhna hrang hrang inhrilhhriatna hun neih leh niin Kolasib district-a Covid-19 Vaccine pek chhuah dan dinhmun Dr.RK Lalthlamuana, SMO hnen atangin ngaihthlak a ni bawk a ni.

Ni 6, April 2021 thleng khan Chief Medical Office-a chhinchhiah dan chuan 1st dose pek chhuah tawh zawng zawng hi 4,325 a ni a, 2nd Dose 1,707 pek chhuah tawh a ni bawk a ni. Frontline Worker 1,795 1st dose late zingah 1,085 te chuan 2nd dose hi an la leh tawh a, Health Care worker 723 1st dose late zingah mi 622 ten 2nd dose an la tawh bawk a ni. District dangte nen khaikhin chuan Frontline worker 2nd dose leh Health Care Worker 1st dose pechhuak tha ber dinhmun Kolasib district hian a hauh mek a ni. Tunah hian kum 45 chin chunglamte vaccine pek chhunzawm mek a ni a, karlehah pawh hei hi kalpui chhunzawm a nih tur thu tarlan a ni bawk. Vaccine la tur a lo kal, beisei zat atanga chhutin, an tlem thin thu thutkhawmnaah hian sawi lan a ni a, vaccine lak thatna uar zawka mipuite hriattir an nih theih nan hmalak dan turte sawi a ni.