Vawiin atang khan Minister Pu R. Romawia chuan a bial a fang tan a, Selesih leh Durtlang North te tlawhin Local Council leh NGO-te nen khawtlang mamawh te sawi hovin inkawmhona hun thatak an hmang.

Minister chuan a bial mipuite tana hun a insiam tam tawk theilo chu pawi a tih thu a sawiin, he bial fan programme hi inpawhtlang taka hmang turin bial mipuite a ngen a. Mipuite chu ram inchuh chunchanga fimkhur tura chahin, pi leh pute atanga ram inrochun, pass la neilote chu dan anga pass siam thuai tha a tih thu a sawi a; chutihrual erawh chuan duham taka chet erawh chu hmingchhiatna leh mualphona a ni tih hre reng turin a chah bawk a ni.

Selesih-a inkawmhona hun hi Local Council Chairman Pu C. Laldingngheta’n a kaihruaia. Sawrkar hmalakna leh hmachhawp hrang hrangte sawi hovin, khawltang harsatna leh mamawhte Minister hnenah an thlen nghal a ni. Hemi hnu hian Durtlang North khawtlang hruaitute nen inkawmhona hun an nei leh a.

Durtlang North Local Council Chairman Pu H. Lalthakima chuan kaihruaiin bialtu MLA Pu R.Romawia’n a rawn tlawh thei leh NGO te nena hetiang hun thatak an hmang thei chu lawmawm a tih thu a sawi a ni.