Vawiin khan Chief Minister’s Conference Hall-ah Health Minister Pu Lal Thanzara hovin Health Department senior officer-ten Medical College neih thuai a nih theihna tura hmalakna kal mek an sawiho.

Meeting kaihruaitu Health Minister chuan State Referral Hospital, Falkawn tihchangtlun hna chak taka thawh mek a nih thu sawiin Medical Council of India in a phut hrang hrang phak thuai tumin tan an la a ni, a ti. Medical College nei thei tur hian hospital-ah khum 250 tal a awm tur a ni a, chawhrualin damlo zali talin Out Patient Department (OPD) nitin an pan ngei tur a ni, tih a nih avangin thawktu doctor leh staff dah belh zel an ni a, damlo pantu pawh an pung chak hle, Pu Lal Thanzara chuan a ti.

Aizawl Civil Hospital chu District Hospital a puan a nih tak vanga tih tet (downgrade) tum ni awma thuthang awm mek chu a diklo tih sawiin Health Minister chuan tih tet tum a hnekin tihchangtlun zelna turin nasa taka hma lak a nih zawk thu a sawi a. Aizawl Civil Hospital tihchangtlun hna thawh kal mek zingah Dental Unit-a Operation Table pakhat leh khum paruk awmna ward, Cardiology Department ah khum 10 awmna ward leh State Medical Library te chu hawn mai hmabak a nih thu a sawi a. Tar chaklo te awmna tur khum 10 awmna Geriatric Ward leh room sawmpali awmna tur Semi Cabin sak mek te, ICU (5beds) leh khum 10 awmna tur Trauma Centre sak hmabak te, Haemodialysis Unit tan khawl thar pahnih lei belh te, Sick Newborn Care Unit (SNCU) ah khum 2 dah belh leh nausen upna panga (5) dah belh te, Laboratory tihchangtlunna tur Auto Analyzer PPP mode a bun tur te leh Central Sterile Supply Department (CSSD) ah khawl thar bun a ni te hian Aizawl Civil Hospital tihchangtlun zel zawk a nih zia a ti lang a ni, a ti. Pu Lal Thanzara chuan Aizawl Civil Hospital chu Nurses Training Centre atan te, kum 2013 a bul tan tawh Doctor te tan DNB (Post Graduate Course) leh MBBS internship tih nan hman chhunzawm zel a nih tur thu leh Aizawl Civil Hospital chu District Hospital ni chunga Super Speciality Hospital a nih chhunzawm zel tur thu a sawi bawk.

Meeting-ah hian Health Commissioner Pu Lalrinliana Fanai, Principal Director Dr.K.Ropari, Director Health Services, Director Hospital & Medical Education te bakah officer dang thahnem tak an tel a ni.