Vawiin khan Minister Pu R. Romawia chuan a Bial fan chhunzawmin Bawngkawn a tlawh a. Bawngkawn Local Council House-ah veng chhunga tlawmngaipawl hrang hrangte leh Sawrkar department hrang hrang aiawhte nen inkawmhona an nei.

Minister Pu R. Romawia chuan thu sawiin Local Council-te leh mipuite inpekna avangin veng chhung inkalpawhna thatak an nei chu lawmawm a tih thu a sawi a, mipuite chu sawrkar tawiawm zel turin a sawm bawk. Minister chuan ram lei tur reng reng chu a ram leitur him leh him lohte, lei tlak a nih leh nih lohte Revenue Department atanga chian hmasa zel turin a ngen a ni.

Inkawmhona hun hman zawh hian Bawngkawn Local Council-ten MLA fund atanga Bawngkawn thlanmual thlang atanga Bawngkawn South panna kawng an kawng laih chu a hmunah a enpui a, an hma laknaah lawmthu a sawi a ni.

He inhmuhkhawmna hun hi Bawngkawn Local Council Chairman Pu H. Lalduhkima'n a kaihruai a, bialtu MLA, Pu R. Romawia, Minister in hun hlu tak senga a bial a fang thei chu lawmawm a tih thu sawiin, MLA fund atanga an sum hmuh thin thute leh tha taka an hman thu te a sawi a. He hun hi Local Council member-te bakah YMA, MUP leh MHIP aiawhte leh Revenue, PWD, PHE leh P&E Department atangin Sawrkar Official ten an hmanpui a ni.