Vawiin khan Tuikhuahtlang-a PCCF Conference Hall-ah Conservator of Forests (Wildlife) Pu Lalrinmawia IFS kaihhruaiin Mizoram chhunga Environment lama hma latu NGO hrang hrang – Central Young Mizo Association (CYMA), Biodiversity & Nature Conservation Network (BIOCONE), Association for Environment Protection (ASEP), Save Environment Association (SENVA), Mizo Academy of Sciences (MAS) leh Mizoram Environment & Forest Consultative Forum (MEFCOF) member-te chu an thu khawm a. Tun hnaia hmanraw changkang tak tak, Air Rifle chhuak thar Telescope vuah theih chi hmang tea Mizoram hmun hrang hranga sava thah chiam chiam dodal nan leh tihtawp a nih theih nan a rang thei ang bera hma lak an rel. He an thil rel hi chak leh zuala bawhzui a nih theih nan he’ng NGO hrang hrangte hi ‘Save Mizoram Birds Joint Action Committee’ tiin an intel khawm a ni.

Heta an thu rel pawimawh zualte chu – State Board for Wildlife Chairman a nih angin Chief Minister zahawm tak chu chak taka hma la turin ngen ni se, tih te; Central YMA chu Mizoram puma an branch tinte hnenah sava kah leh tihhlum a tawp theih nana hriattirna tichhuak tura ngen ni se, tih te; kohhran hrang hrangte chu sava kah leh tihhlum a tawp theih nan an member-te hnena a tam thei ang ber zirtirna pe tura ngen ni se, tih te; Local Council leh Village Council tinte chu an veng/khua mipuite hnena hemi chungchang hi uar taka puang chhuak turin ngen ni se, tih te a ni a. He an thil tum hi a hlawhtlin theih nan a tul ang zela hma lak an tum a ni.