Power & Electricity Department Minister leh Bialtu MLA ni bawk Pu R. Lalzirliana  chuan vawiin chawhnu khan Tuivawl Built-Up Steel Girder Lei, Saitual-Phullen Road-ah a hawng.

Minister Pu R.Lalzirliana chuan kalkhawm zawng zawng te hnenah lawmthu sawiin, Lei dawh zawh a ni chu mimal tak pawha lawmawm a tih thu leh Sawrkar ang pawha hmalakna chhen fakawm a nih a rin thu a sawi a. PWD Engineer te, khawtlang hruaitute leh NGO hrang hrangte inpekna leh tawi awmna tam tak azarah hna pawh rang tanga thawh a ni, a ti a. Bailey Bridge awmsa hi kum 1992 atangin hman tan a ni a, a lo rei deuh tak avangin a chak tawk tawh lo a, Tuivawl ral a mipui awm ten harsatna tam tak an tawk thin a, motor tonne 10 phur chin chauh in a zawh theih avangin Lei thlen dawnah bungrua hlan thlak thin a, hlan chhoh leh zel a ngai thin a, thil phurh chhuah leh phurh luh chungchangah mipui ten harsatna an tawk thin a, heihi sawrkar chuan a ngai pawimawh a, a hmalakna vawiinah a lo lang a ni, tiin a sawi.

Tuivawl Lei hi NABARD Scheme RIDF-XXII Project, 'Rural Roads & Bridges' atanga thawh a ni a. A estimate pumpui chu Rs. 928.00 lakh a ni. Rs. 820.12 lakh hi NABARD loan atanga hmuh niin, a bak Rs.107.88 lakh hi State Sawrkar in a tum a ni. He hna hi Ni 10.8.2017 khan M/S Sunshine Overseas Infra Pvt. Ltd., Tuikhuahtlang hnenah pek a ni a, Ni 6.12.2019 khan hnathawh zawh fel a ni.

Tuivawl Lei thar hian a phurh theih chin chu 70 metric tonne a ni a, 700 Quintals ang vela chhut a ni. Helai khua chhevela lo neituten sawhthing leh thildangte phurh chhuah/phurh luh kawngah harsatna an lo tawh thin te chu a kiang chho zel a rinawm a ni. Tuivawl Lei hawn tak hi mithiam ten an design hnuah IIT Guwahati a bridge expert te endik tir a ni a, a lei hi rinawm tawk tura ngaih a ni. Double Lane, feet 180 a sei, Motor kalna feet 24.6 a zau a ni a. Loading class hi 70R a ni. A chhuat hi reinforced cement concrete M35 Grade, 250 mm a ni. He lei dawh nan hian an ram phal takin heng mite- Pu Biakhmingthanga, Phullen leh Pu Thandawla, Lungpher te hian an pe a, an chungah PWD Department leh Sawrkar pawhin lawmthu a sawi a ni.

R.Tuivawl Bridge hawnna hi Chief Engineer (Road)  Er.R.Lalrintluanga'n a kaihruai a; YMA, Thanglailung Branch ten he huna kalkhawm lo lawmin zaipawl hla an rem a. Phullen Pastor Rev. Lalbiaknunga chuan hunserh a hmang. Superintending Engineer, Eastern Circle Er. Vanlalchhuana'n technical report a pe a, thusawi tawi Phullen Village Council President  Pu B.Lalhriatpuia leh SN Malik, General Manager,  NABARD hnen atangin ngaihthlak a ni. Chief Engineer (Planning) Er. J.Zothanpuia chuan lawmthu sawiin he hun hi a khar a ni.

Minister hi Saitual DC Pu C.Lalpeksanga, PWD a thawktu te leh midangte'n an tawiawm a ni.