Vawiin khan Lok Sabha MP Pu C.Lalrosanga chuan  Sansad Adarsh Gram Yojana (SAGY) hnuaia model village atana a thlan Muallungthu tlawhin  khawtlang hruaitute nen an khawtlang hmasawnna tura hmalakna tur hmunhma hrang hrang an enkual a, inkawmhona hun tha tak a hmanpui nghal bawk. Lok Sabha MP hi Aizawl South III Bialtu MLA Dr. F.Lalnunmawia'n a tawiawm a ni.

Lok Sabha MP Pu C.Lalrosanga chuan  khawhlun tak mai Model Village atana a thlang thei chu amah pawhin lawmawm a sawi a. Bialtu MLA leh khawtlang mipuite nen theihtawp chhuahin hmasawn turin tan an la tlang dawn tih sawiin, MP Fund piah lamah Central Sorkar Scheme  hrang hrangte pawh Muallungthu khawtlang tih hmasawn nan haichhuah tum a nih thu a sawi. Model Village a siam tura hmalakna turah thurawn inpek tawn a tul thu sawiin, khawtlang hmasawn nan khawtlang hruaitu te chu an pawimawh hle a ni tih hi in hre thar turin a chah a ni.

Bialtu MLA Dr. F.Lalnunmawia pawhin a bial chhung ami Muallungthu khua Model Village atana MP in a thlang chu vanneithlak a tih thu sawiin a thlangtu MP chungah lawmthu a sawi a. Midangte entawn tlak Model Village ni tur chuan hmuh theih hmasawnna piah lamah rilru chhungril tih hmasawn hi a tul hle a ni a ti a. NLUP emaw SEDP emaw atangin nuai 5 pawh sem mah ila rilru chhungril tak atanga chhuak hmasawn tumna kan neih chuan si loh chuan awmzia a awm lo vang a ti a ni.

Sum sen hek ngailo leh sum nghahchhuah ngailo tun a tih nghal theih faina leh thianghlimna kawnga bul tan nghal turin khawtlang mipuite a sawm a ni.

Inkawmhona Muallungthu YMA RUN a neih hi Pu Zothankima VCP Muallungthu in a kaihruai a. Aibawk BDO Pu Remlalliana Hnamte pawhin he hun hi a hmanpui a ni.