New Delhi a cham mek Chief Minister Pu Zoramthanga chuan vawiin khan sawrkar laipuia Women and Child Development leh Textiles changtu Union Minister Pi Smriti Zubin Irani chu a pisaah hmu in, Mizoram leh India hmarchhak state dangte a Geotechnical textile hman chungchang leh mipui mamawh dangte a sawipui.

Women and Child Development Minister chuan Mizoram district thar pathum - Saitual, Khawzawl leh Hnahthial tan One Stop Centre pakhat theuh pek Chief Minister hi a tiam a.

Chief Minister chuan tuna India hmarchhaka Geotechnical Textiles Promotion scheme kallai mek chu kumin March thlaah a tawp dawn tawh avangin, he hmalakna hi chhunzawm zel a nih theih nan hmalak sak turin Union Minister chu a ngen a. Khawtlang hman tur tuizem lian atan te, lo leh leilet a tui mamawh dahkhawlna tur leh leimin tur venna atan te leh kawng siamna atan te heng geotextiles hi India hmarchhak state leh a bik takin Mizoram tan an tangkai thu Chief Minister chuan sawiin, Horticulture sector atana geotechnical textile hman tangkaina tura proposal lo thehluh a nih tawh thu a sawi bawk.

Pi Smriti Zubin Irani nen an inkawmnaah hian Chief Minister chuan Ministry of Textiles chuan DoNER hnuaiah 10% Gross Budgetary Support for North Eastern Region atan sum la hmanloh la awm chu heng proposal thehluhte tihhlawhtlin nan hian hman a nih theih nan hma lak sak turin a ngen a ni.

Chief Minister hi Planning Vice-Chairman Pu H. Rammawi, Planning Secretary Dr. Vanlalramsanga leh official dangten an tawiawm a ni.