Vawiin khan Aizawl East-II bialtu leh Minister ni bawk Pu Robert Romawia Royte chuan a vawi khatna atan a bial chhung Veng hrang hrang - Saron Veng, Tuithiang Veng, Armed Veng, Chite Veng leh Armed Veng South te a tlawh.

Minister Pu Robert Romawia Royte chuan amah lo lawmtute hnenah Pathian leh Bial mipuite duhsaknaa Aizawl East-II leh Mizoram hmasawnna tura thlan tlin a ni chu lawmthu a sawi a.  Chief Minister Pu Zoramthanga'n hna thawk thei tura Minister atana a ruat angin theih tawp chhuaha hna a thawh tan thu leh nasa taka hnathawh zel a tum thu a sawi a. Kawng hrang hranga hna a thawhnaah bial mipuite tawiawmna leh tawngtaisakna a ngen.

Minister chuan Zofaten infiamna lama chak zawka hma kan sawn zel theih nan Sports policy mumal tak  duan mek a nih thu te, Mizoramah khualzin mi tam zawk hip luta, ram tlawh chakawm tak ni tura Tourism department-in hma a lak mek thu te, Institute of Hotel Management changtlung taka function tura hma lak mek a nih thu te, inbiak pawhna lamah changtlung leh tha zawka kalpui tura mawhphurtute nen hma an lak mek te thu a sawi a. Bial chhung mi tu pawhin hna an thawhin quality tha leh belhchian dawl taka thawk zel turin a chah a ni. Neitu rilru pua official-te hnathawhpui thiam turin Minister chuan a bial chhung mipuite a chah bawk.

Minister hnenah hian veng hrang hrang khawtlang hruaitute leh tlawmngai pawl hruaituten an mamawh leh harsatna a hnenah an thlen a. Pu Robert Romawia Royte chuan an harsantna te chu a tahtawla a theih ang anga bawhzui a tum thu a hrilh a ni.

Naktuk hian a bial chhung Veng pahnih Dawrpui leh Chhinga Vengte Minister hian a tlawh leh ang.

Pu Robert Romawia Royte hi a department chan pathum - Sports & Youth Services, Tourism leh Information & Communication Technology hotute bakah Public Health Engineering , Public Works Department, Education, Urban Development & Poverty Alleviation official-te leh Party hotuten an tawiawm a ni.