3047/2022-2023
Aizawl the 14th December 2022 : Vawiin khan Armed Veng Community Centre-ah Minister leh Aizawl East-II bialtu MLA Pu Robert Romawia Royte-in Aizawl East-II Area chhunga M.U.P. member te hnenah Krismas thilpek a sem.

Minister Pu Robert Romawia Royte chuan a bial chhunga M.U.P member 1800 zet te hnena an chhungkuain Krismas thilpek an pe chhuak thei chu lawmawm a tih thu a sawi a. Kum upa te chu chhungkua, khawtlang, Kohhran, ram leh hnam tan an hlu a, mi changkang apiangin an hlutna hi an hriain an zah thiam thin a ni. Keini Mizote pawh hian upate hlutzia hi kan hriat thar zel a ngai a ni a ti.

Minister Pu Robert Romawia Royte chuan “Aizawl East-II bialah kum upate kan duhsak thin a, Pathian zarah leh MUP Area hotute nena kan thawhho thatna zarah kan bial Aizawl E-II biala kum upa te hi Mizorama M.U.P Member vannei ber an nih theih nan theihtawp ka chhuah zel ang” tiin theihtawp chhuah zel a tum thu a sawi bawk. Krismas leh Kumthar hlim taka hmang turin Aizawl East-II Area M.U.P. member zawng zawngte Duhsakna hlan chungin chibai a buk a ni.

Pu Robert Romawia Royte-in M.U.P. member 1800 te hnenah Krismas chibai bukna thilpek Dinner Set a sem a, kum 4 MLA & Minister a nih chhung hian Pu Robert Romawia Royte hian a bial Aizawl East-II M.U.P. te tan hian Rs. 53,69,450/- zet a lo seng tawh a ni.