3046/2022-2023
Aizawl the 14th December 2022 : Vawiin khan Mizoram Sports and Youth Services Minister Pu Robert Romawia Royte chuan Vanapa Hall-ah KD Elementary and High School kum 25 (1997-2022) tlin lawmna chu khuallian niin a hmanpui a, silver jubilee puala buatsaih souvenir a tlangzarh bawk.

Minister Pu Robert Romawia Royte chuan KD Elementary and High School in kum 25-na hmel a lo hmu ta chu a lawmpui takzet thu a sawi a. Zirtirtute inpekna, Pathian kuta an innghah tlatna te, zirlai nu leh pa te thawhhona leh puihna tha leh zirlaite taihmakna leh thuawihna rah a ni a ti a. KD School tum ber naupangte thiamna tak tak pe a, nunkawng tha sial sak chu ngaihsanawm a tih thu sawiin Minister chuan zirlaibu leh note te chu zirtirna puitu hmanrua mai chauh an ni a a phena hriatna, thiamna tak tak zirlaite neih tir a, mi puitling leh tunlai nun mila khawsathiam, khua leh tui tha ni tura cherchhuah a nih thu a sawi. Khuallian chuan zirlai naupangte chu tunlai khawvel buai tak kara harsatna leh chona hrang hrangte dawngsawng a, mumal taka do theitu ni tura chher a pawimawh thu a sawi a. Zirna chu lungthu pathum tan ho rah anih thusawiin zitirtu, nu leh pa leh zirlai te tanrualna a ni a ti. Hun hman thiam a pawimawh thu sawiin nikhata darkar 24 neih theuh hi hmang tangkai turin naupangte a chah a; khawwvela mi hlawhtlingte chu hun hmang thiam an nih thu a sawi. Minister chuan kalkhawm naupang leh nu leh pa te chu zirna ngaipawimawh a taima zual sauh sauh turin a chah a ni.

Vawiin Silver Jubilee lawmna programme hi Rev. C Chhuntluanga, Bialtu pastor, BCM in hunserh hmangin a hawng a, Pu Biakhmingliana Pachuau, Principal KD Elementary School-in welcome speech a sawi a. KD Elementary School dintu Founder Pi Biakhlupuii leh Pi Lianngengi, Headmistress, KD Elementary School te pawhin thu an sawi bawk.

KD Elementary and High School hi february ni 5,1997 a din a ni a. Tunah hian zirlai naupang-700 chuang awm mekin zirtirtu leh non-teaching staff-33 an awm mek a ni.