3656/2022-2023

Aizawl, the 22nd February, 2023: Tukin zingkar khan Bialtu MLA leh Minister Pu Robert Romawia Royte chuan a bial chhung Armed Venga Vengnuam area-a kawng siam mek a endik a, kawng siam mek chungchangah a bul hnaia chengte ti tipuiin an rawtnate ngaithlain hmalak dan turte an sawiho a.

Bialtu MLA hian Check Dam siam tura hma lak mek pawh endik nghalin, Check Dam siam nan hian Rs 300 lakhs a awm tawh a, tha taka hna thawh kan duh a ti a. Check Dam tha kan duh avangin Contractor tha pawh kan duh a ni a ti. Hnathawh a nih theih hunah he lai hnai atangin inhlawh duh an awm a nih chuan kan duhsak ang a ti.

Bialtu Minister Pu Robert Romawia Royte hian Armed Veng field siamthara ko pang lam chu mipuite him nan hmalak dan tur leh a bula tui luankawr siamthaa a khuhna siam dan tur ngaihtuah a tum thu a sawi bawk.

Bialtu MLA Pu Robert Romawia Royte hi PWD Aizawl Road North  EE Pu C.Lalthangvela leh MNF Block leh Unit hruaitute bakah vengpa hovin an tawiawm a ni.