3655/2022-2023

Aizawl, the 22nd February, 2023: LRS&WC Department buatsaih Rubber Growers' Meet chu vawiin khan Chanmari YMA Hall-ah neih a ni a, Minister Pu R. Lalzirliana chu khuallian niin, he hun hi a hmanpui a ni.

Khuallian Pu R.Lalzirliana chuan thu sawiin sawrkarin kuthnathawktu te hma ngai chung leh Rubber and Allied crops hmasawnna hi state economy siamtha thei tu pawimawh tak a nih zia hriain, Rubber & Allied Crops Development Board a din a; chumi kalzel ah chuan Project hrang hrangte siam chho in hma lak chhoh nghal a ni a a ti a. Tun hma chuan Rubber Board Site office, Kolasib ah dah a ni thin a, chu pawh chu Silchar atanga rawn vil a nih deuh ber avangin inkungkaihna pawh kan nei tha lem lo a, Rubber chungchanga hmalakna leh Rubber Board of India te nena kan thawhhona pawh a beitham hle a ni a ti a. Harsatna kan tawh thinte Rubber Board of India lama thlen a nih hnuin, Rubber Board Office leh a thawktu Officer viak tha tak Mizoramah an rawn dah ta a. Kan ram economy tan leh kut hnathawktute tan Rubber chin kawnga hmalakna pawhin nasa takin hma a sawn a ni tiin a sawi.

Minister chuan Mizoram ah hian Department tanpuina a Rubber huan siam hi chhungkua sangthum bawr vel an ni a, Department tanpuina tel lovin Rubber ching hi mi taima leh thahnemngai tak tak an awm bawk a ni a ti a. Mahni ke a ding thei tur leh kan ram economy hmasawnna tura in hmalakna te hnenah lawmthu a sawk nghal a. Rubber plantation engemaw zat hi hnai theih a nih tawh avangin Department-in Department hmalakna in nikum hmasa lam khan rubber herna khawl za semchhuah a ni tawh a. Zau hrang hranga inhmantawm turin NABARD atangin Rubber Smoke House sawmnga sakna turin pawisa semchhuah a ni bawk a ni a ti a. Heng khawlte hi tangkai taka hman chhoh mek niin, a theih ang chin chinah Sawrkar pawhin hma a la chho zel bawk a ni a ti a.

Pu R. Lalzirliana chuan India ram hian Rubber ah kan tharchhuah aia kan hmanral hi a tam zawk avangin Rubber mamawhna hi a sang em em a, ramdang atanga kan lakluh bakah Synthetic Rubber te siam a lo ngai hial a, Mizoram a Rubber chin te hi a hnai a tha khawp mai a, state dang ai mahin a hnai hi a tha in a hriat a, amaherawhchu a sawngbawl tak hi thil thar kan tan a nih avangin a chingtute pawh an hlawk tur angin an la hlawkpui lo niin a lang a ni a ti a. Rubber Board Official-ten thahnemngai taka hma la in tun dinhmunah chuan hma kan sawn ve tawh hle a; kumin atang hian Rubber rate hi a tha chho hret hret zel a, tun dinhmunah hian Kg 1 ah cheng 137- in an lei a, sawrkar inrawlh kher pawh pawh ngai lo in a market-ah hian harsatna a awm lo a ni tiin a sawi. Khuallian chuan hlawhtling tur chuan, kuthnathawktu taima tak tak te leh heng thlai chin kawnga tui mi te tha kan tihchak a pawimawh hle a, chutiang tur chuan hma la mektu te leh a ti tak tak tur mite thlan leh chhawmdawl kan ngaihtuah hi a pawmawh takzet a ni tiin rubber chingtute chu an kal zelna turah duhsakna a hlan a ni.

He hunah hian Dr N.K. Raghavan, IRS, Executive Director, Rubber Board chuan keynote address a sawi a, Pi Jayamol C.L, Dy. Rubber Production Commissioner, Rubber Board, Silchar chuan kalkhawmte a lo lawm a. Minister hi Dr. H.Lalthlangliana, Secretary LRS&WC leh midangten an tawiawm a. He hunah hian Rubber ching tute thahnem tak an kawlkhawm a ni.