3654/2022-2023

Champhai, the 22nd February, 2023: Champhai District chhunga Bank hrang hrang kaltlanga December 2022 quarter tawp thlenga hmalaknate thlirletin District Consultative Committee (DCC) chu vawiin chawhma dar 11:00 khan an Chairman, District Bawrhsap Pu James Lalrinchhana hovin DC Conference Hall-ah an thukhawm a, Champhai District RD Block 2 huamchhunga Bank leh Stakeholder hrang hrangte hmalakna thlirho a ni. He hun hi Lead District Officer (LDO) Pu Siddharaj, Manager, RBI Aizawl chuan a telpui bawk.

District Bawrhsap Pu James Lalrinchhana chuan banking lama hmasawnna Champhai District-ah hmuh theiha a awm chu lawmawm tiin, bank-a thawktu leh line department hotute chu thawhhona tha nen tha thlah lova, hmasawn zel tura tan la zual sauh sauh turin a chah a. Mipuiten hamthatna leh social security scheme pawimawh tak takte an hriat a pawimawh thu sawiin, banker-te chu Financial Literacy Camp neihnaahte hengte hi uar lehzuala puangzar tam turin a chah a. Sumdawnna hmun pawimawh tak Champhai District-ah bank chhawr tangkai thiam a ngaih thu pawh tarlangin, dan ang taka bank-te dawr a nih theih nan leh hamthatna awmte bank dawrtuten an hmuh theih ngei nana kaihruai thin turin bank thawktute a chah bawk a. Kalkhawmte chu District hmasawnna tura mi pawimawh tak takte an nih thu sawiin, anmahni mamawha dawr thintute chu tha taka dawngsawng thin turin a fuih nghal bawk.

Pu Jyoti Munna Soren, Lead District Manager (LDM), SBI Lead Bank Office Champhai chuan kalkhawmte lawmna thu a sawi hnuah quarter kalta chhunga Champhai District Bank leh Stakeholder hrang hrangte hnathawh leh hmalaknate thlirletna neih anih bakah hmachhawpte sawiho nghal a ni.

Meeting-a tarlan anih danin December 2022 quarter chhunga Champhai District-a bank hrang hranga pawisa dahluh leh pekchhuah zat inthlauh dan khaikhinna Credit Deposit (CD) Ratio chawhrual chu 74.57% a ni a, quarter hmasa September 2022 quarter tawpa CD Ratio 73.98% atangin 0.59% in a pung a; hei hian CD ratio tha ni tura hniam lam bituk zat 60% chu 14.57% in a khum a ni. Hemi hun chhung hian bank-ah cheng nuai 46726.99 dahluh a nih laiin bank-in pawisa a pekchhuah zat hi cheng nuai 34842.65 a ni a. 2022-2023 Financial Year kal mek 2022 December thla tawp thlenga Annual Credit Plan (ACP) hnuaia hnathawhte thlirho ni bawkin, Priority Sector atana target 6,884 (cheng nuai 14,511.51) atangin 4,849 (cheng nuai 8073.03), 55.63% tih hlawhtlin a ni a. Non Priority Sector hnuaia target 159 (cheng nuai 3,300) atangin 2,130 (cheng nuai 9723.41), 294.64% tih hlawhtlin a ni. Hemi quarter chhung hian Pradhan Mantri Mudra Yojana (PMMY) kaltlangin Sishu hnuaiah mi 30, Kishore hnuaiah mi 171, Tarun hnuaiah mi 50, Stand up India hnuaiah mi 3, an vaiin mi 254 te hnenah loan cheng nuai 1066.92 hu pek chhuah a ni bawk.

Nikum December quarter tawp thlenga Social Security Scheme hnuaia inziaklut tawh zawng zawng zat chu Pradhan Mantri Jan Dhan Yojana (PMJDY) hnuaiah mi 21,510; Pradhan Mantri Jeevan Jyoti Bima Yojana (PMJJBY) hnuaiah inziaklut tawh 18,410 awmin, hamthatna dawng thei tur 43,426 a?angin inziaklut nawn leh 6,375 an awm a. Pradhan Mantri Suraksha Bima Yojana (PMSBY) hnuaiah inziaklut tawh 23,370 awmin, hamthatna dawng thei tur 59,287 a?angin inziaklut nawn leh mi 11,320 an awm a, Atal Pension Yojana (APY) hnuaiah 803 an inziaklut tling tawh bawk. Hemi quarter chhung vek hian Priority Sector hnuaiah Non Performing Assets (NPA) cheng nuai 3793.40 (17.59%) leh Non Priority Sector hnuaiah NPA cheng nuai 132.47 (0.99%) awmin bank chhawr tangkai dan inzirtirna Financial Literacy Campaign (FLC) tum 148 neih a ni a; hemi kaltlang hian mi 2,134 chuangte zirtirna pek an ni.

DCC thutkhawmah hian Line Department leh Bank-te chu an hnuaia hamthatna awmte a dawng thei tur mipuiten an dawn theih nana kawng kawhhmuh nasa lehzual tur leh, puih an tulnaahte thahnemngai taka pui tura chah an ni a. Bank branch hrang hrangte chu MUDRA Helpline tar chhuak vek tur leh NPA neih dan kimchang LDM hnena pe vek tura chah an ni a. Bank-in sum a kawl theih zat retention limit tisang tura tan la tura chan ni bawkin, dan lova thil ti misualte man chhuah kawnga Police leh Bank-te thawhho dan tur tha zawk leh dan hnuaia hmalak zel dan turte sawiho a ni bawk a. Bank hrang hrangte chu mipuite hnena bank chhawr tangkai dan inzirtirna financial literacy camp tam zawk nei tura hriattir an ni a; mipuiten Social Security Scheme an chhawr tangkai theih nan a tul anga hmalak nise tih a ni a. Heng bakah hian Currency Management -Remittance chungchangte, Bank leh ATM venhim chungchangte sawiho niin, security report ngaihthlak a ni bawk.

December 2022 quarter tawp thleng khan Champhai District-ah Bank branch hrang hrang 18 a awm a, Public Sector Bank 5, Private Sector Bank 5, Regional Rural Bank 7 leh State Cooperative Bank 1 te bakah ATM 9, Business Correspondent 8, CSP 1 leh IPPB hnuaia Banking Touch Point 26 te a awm a. Financial Literacy Centre 2 (Lead Bank Office, SBI Sponsored leh Champhai Financial Literacy Centre, MCAB Ltd.) te awm bawkin, Champhaiah RSETI (Rural Self Employment Training Institution) hranpa a awm loh avangin RSETI Aizawl hnuaiah a awm a ni.