Vawiin chawhma khan Minister of Tourism, Sports etc. Pu Robert Romawia Royte chuan Govt. J.Thankima College (GJTC) Annual Week kharna hun Vanapa Hall-ah a hmanpui.

Minister chuan zirlaite fuihin kan tum san leh san loh hian a hnua kan hun hmandan a hril thui hle a ni, a ti a. Zirlai nih chuan kan lehkha zir hun chhung kan hman that a ngai a, chumi chhunga kan awmdan a zirin kan hlawhtlingin kan hlawhchham thin a  ni tiin he hun hlu tak chhung hian zir zawh huna kan awmdan tur kan ngaihtuah lawk a tul a ni, a ti a. Kan ngaihtuahna hian kan chetdan tur a hmakhalh zel avangin kan ngaihtuahna kan ven fimkhur a, kan hman thiam a pawimawh hle a ni, a ti a. Kan khawvel chenna mil zela ngaihtuahna kan her thiam a tul a, ngaihtuahna dik nei chunga kan nun a pawimawh a ni tiin a eng zawng zela thil thlir thiam a ngai a ni, a ti a.Subject hrang hrang atanga zirlai kan zirtir bakah hian heng zirlaiin a ken tel, a phena zirtur thleng hian kan zirtir thiam a ngai a ni tiin zirtirtute a chah a. Mihring reng reng harsatna tawk lo kan awm lova, beidawng ringawt lova kan beih tang tang hian hlawhtlinna a awm thin a ni tiin rinawm taka hmalam pan zel turin kalkhawmte chu a fuih a. Thalaite hamthatna tur sports policy thar buaipui mek a nih thu a tarlang bawk a ni.

Programme hi Students’ Union (SU) Vice President Immanuel Lalhmangaihsanga chuan a kaihruai a. Principal Prof. C.Lalremruata chuan kalkhawmte lawmna thu a sawi a. SU General Secretary C. Lalchhanhima chuan annual week chungchang report a pe a. Chawhnu lamah entertainment session neih chhunzawm a ni ang. Government  J.Thankima College (GJTC) hi kum 1992 khan din a ni a. January Ni 27, 2017 atang khan Bawngkawn Brigade-a an Central Campus thar an luah tan a. Tun dinhmunah hian zirlai 600 vel an awm mek a ni.

Attachment

  • Loading attachment...