Directorate of Agriculture (Research & Extension) hnuaia State Nodal Cell, Agricultural Technology Management Agency (ATMA) buatsaih ‘State Level Workshop-cum-Exhibition’ chu vawiin khan Synod Conference Centre, Aizawl-ah Agriculture Minister Pu C.Lalrinsanga’n a hawng. He hunah hian Aizawl South III bialtu MLA Prof.F.Lalnunmawia chu Khaulzahawm a ni a; Commissioner & Secretary, Agriculture Pu Lalhmingthanga, Director of Agriculture (Research & Extension) leh State Nodal Officer (ATMA) ni bawk Dr.H.Saithantluanga, Director of Horticulture Dr. Elizabeth Saipari, Agriculture Department bakah a hnuaia Agency hrang hrang officials & staff leh kuthnathawktu farmer engemawzat an tel a ni.

ATMA State Level Workshop-cum-Exhibition hawngtu Khuallian Pu C.Lalrinsanga chuan a la rei loh ngaihtuahin rampumah leh Mizoramah ngei pawh ATMA hmalakna chuan rah a nei hle tawh a ni a ti a. Democracy hlutzia sawiin Minister chuan mipuiten an aiawh tura an thlante leh sorkar hnathawkte chuan mipuite nena tangrualin ram leh mipui hmasawnna tur ngaihtuah leh thawkho tur an ni a, chuvangin an awmna hmun theuhah theihtawp chhuah a pawimawh hle a ni a ti. Kuthnathawktute hamthatna tura sorkar laipuiin Agency hrang hrang kaltlanga ruahmanna a siamte chu heng Agency hnathawkte leh a kaihhnawih State Department-te chu thawhhona tha zawk ‘coordinate & converge’ lampangah ngaihtuahna seng se a duh thu a sawi bawk. Ramdang (foreign)-a a zinchhuah changa agricultre & farming lama an hlawhtlinna chhan chu farmer-te leh sorkar hnuaia thawk officials leh mithiam technician-te chu inhrethiamin inthurual takin hna an thawkho thinna a nia a hriat thu a sawi. Tun khawvelah hian ram hlutna leh hnam zahawmna chu sum leh pai dinhmun (economy) berah a innghat tawh avangin sorkar leh mimal anga hmalakna zawng zawng chuan sum leh paia intodelh a tinzawn ngei ngei tur a ni a ti bawk. Tun hnaiah Agriculture Department mithiamten french bean variety (chi) pakhat, hming la phuah loh an hmuhchhuah thar chu Agriculture Minister chuan amah ngeiin a hming tur pawh sak a hauh thu a sawi bawk.

Khuallian Agriculture Minister Pu C.Lalrinsanga chuan State Nodal Cell, ATMA hmalaknain agriculture leh a kaihhnawih thila Researcher, Extension functionary-te leh kuthnathawktute kalkhawm theihna hun tha tak buatsaih a ni thei chu lawmawm a tih thu a sawi a. Mizoram intodelhna tur thil pawimawh tak tak an zirchhuah a, a hlawkna chu a taka hmuh ngei theih nan he State Level ATMA Workshop-cum-Exhibition chu duhsakna sang ber a hlan a ni.

Khualzahawm Prof.F.Lalnunmawia, MLA pawhin thusawiin sorkar laipuiin kuthnathawktute tana ruahmanna a siam tawh zingah ATMA chu a hlawhtling ber tiin a sawi theih hial a ni a, zau zawka kalpui ni thei se chuan ramin a hlawkpui lehzual thei a ni a ti. Mizoramah agriculture mithiamten farmer-te vawi engemawzat training pein, Department hnuaia Demonstration Farm-a training pek laia hlawhtlinpui em em si, a taka farmer-ten an hman zui lohna chhan hi zirchian a, mithiamten hmalakna tha zawk an zirtir ang ngeia Mizo farmer-te pawhin tizawm se a that zawk a rin thu a sawi bawk. Sorkar pawhin ram leh mipuite hmasawnna tichak lehzual tura Socio-Economic Development Programme (SEDP) a hman turah capacity building leh skill development chu a dah pawimawh berte zingah a tel dawn a; argriculture lamah pawh ‘integrated farming system’ bultan chu duhthusam a ni a ti bawk.

Vawiina Workshop hawnna inkhawm kaihruaitu Pu Lalhmingthanga, Commissioner & Secretary, Agriculture pawhin thusawiin India ram leh a bikin Mizoram mipui hmun thuma thena hmun hnih dawnte ei leh bar hmuhna Agriculture leh a kaihnawih enkawl tur leh hmasawnna ngaihtuah tur hian Central sorkar chuan Ministry of Agriculture & Farmers Welfare a din a ni, a ti. He Workshopa tel tura kalkhawm department hrang daih eh thiltih inanglo anga langte pawh he Ministry pakhat chhunga mi leh thawkho vek an ni a, chuvangin hetianga inhmukhawm hmalak dan turte pawh ngaihtuah ho hi a hlawk thlak dawn hle a ni, a ti bawk. Thawhho han tih hian an tih tur theuh tha taka an tih theuh piah lamah an hnatahwh theuh chu a inla lawn tur a ni a, chu chu Saptawng chuan he Workshop thupuiah an hman ‘Research-Extension-Farm Linkgaes’ tihna a ni a ti. Tun Workshop-ah hian kuthnathawktute tana ruahmanna awm thei tur SEDP hnuaiah te, Bank subsidy, thlai thar hralhna (agricultural marketing), skill development, entrepreneurship leh agricultural science-ah zirlaite tan career guidance hunte neih tum a nih thu a tarlang bawk.

Director of Agriculture (R&E) leh SNO, ATMA ni bawk Dr.H.Saithantluanga pawhin thusawiin vawiina hawn tak Workshop leh Exhibition chhung hian technology chi hnih kalpui a ni dawn a ni, a ti a. Pakhat zawk ‘Material technology’ chu Exhibition Stall hrang hrangah a taka hmuh theihin an thil dehchhuahte a inphochhuakte chu a ni a, a pahnihna ‘Knowledge-based technology’ chu Agriculture mithiamte leh farmer-te tukhawmin Seminar an neih turah inzirtirna tharte leh hmalakho zel dan tur an sawihona tur chu a ni, a ti.

ATMA Workshop hawnna inkhawmah hian ATMA hmalakna hrang hrang hlawhtling taka kalpui leh hnathawk tha thlanchhuahte hnenah a hnuai mi ang hian lawmman leh chawimawina pek a ni :

I. STATE LEVEL BEST FARMER : hi District tinin an mi thlanchhuahte hming leh hlawhtlin dante an rawn thawn atanga thlanchhuah a ni. He Award hian certificate leh pawisa fai Rs.1,00,000/- a keng.

(1). Agriculture Sector - Lalchhana, Buhchangphai, Kolasib District

(2). Horticulture Sector - Vanlalthafamkima, Champhai vengthlang, Champhai District

(3). AH&Vety Sector - F.Lalrawngbawla, Lungkawlh, Aizawl District

(4). Fisheries Sector - Hmangaihthanga, Zozam veng, Serchhip District

(5). Sericulture Sector - V.Sangluaia, Chhiahtlang, Serchhip District

II. EXEMPLARY EXTENSION WORK TO DISTRICT BLOCK LEVEL EXTENSION FUNCTIONARIES : hi ATMA staff ten anmahni District theuha mi an thlanchhuahte atanga vote hmu sang ber hnena pek a ni a. Certificate leh pawisa fai Rs.15,000/- a keng tel.

(1). Aizawl District - Lalmalsawma Khawlhring, BTM, Aibawk Block

(2). Lunglei District - Biakhmingthanga, ATM, Lunglei Block

(3). Siaha District - JV Lalremruata, ATM, Siaha Block

(4). Champhai District - Dajied Lalthlamuana Betlu, BTM, Champhai Block

(5). Kolasib District - Rambuatsaiha, DPD, Kolasib District

(6). Serchhip District - Lalremruata, BTM, Serchhip Block

(7). Lawngtlai District - Moses Zonunsiama, ATM, Bungtlang South Block

(8). Mamit District - K.Lalhmasawna, BTM, West Phaileng Block

III. BEST PERFORMING ATMA AWARD : hi monitoring team ten district tinte tlawh kualin thil hrang hrangah point hmu sang 3-te hnena pek a ni.

1st Prize - Champhai District (Certificate + Rs.50,000)

2nd Prize - Aizawl District (Certificate + Rs.30,000)

3rd Prize - Kolasib District (Certificate + Rs.20,000)

Consolation Prize - District 5 (Lunglei, Siaha, Serchhip, lawngtlai & Mamit District) hnenah Certificate + Rs.10,000 theuh hlan a ni.