555/2022-2023
Aizawl 20th May 2022: Vawiin khan Sports & Youth Services, Tourism leh Information & Communication Technology Department Minister Pu Robert Romawia Royte chu Mizoram Armed Police Association (MAPA) 2nd General Assembly ah khuallian a ni a, he hun hi Aijal Club-ah hman a ni.

Khuallian Pu Robert Romawia Royte chuan thu sawiin Mizoram hmun hrang hrang atanga lokal khawm MAPA member  chungah lawmthu a sawi a. Mizoram chu state ralmuang ber ti a hriat a ni thin a, ram a ralmuang lai chuan Police pawimawhna a langsar lo a nimai thei a, tun hnaiah ramri buai-ah Armed Police pawimawhna mitinin kan hre theuh a, indaihloh tak karah resource mobilization rem hre taka buatsaih a ni a, ramri chungchanga sawrkar dinnaah police ten an thawh hlawk em em a, Mizoram police inpekna hi ram anga kan chhuan a ni, tiin a sawi. Ram leh hnam humhalh nana,  ngam thui tak police huaisen te chu chawimawi an phu a, ram hming thatna hi mi tlemte hnathawh vang a ni thin a, chutiang chuan police te hnathawh hmingthatna chu ram hmingthatna a ni a, sawrkar in a chhuang a, hnamin a chhuang bawk a ni tiin a sawi. Minister chuan Mizoram police te chet that avangin inchhuanna (pride) tha thinlungah kan nei thin a ni tiin a sawi bawk a ni.

Khuallian chuan Police Internal Administration kenkawh chungchangah hotute thuawih a pawimawhzia sawiin, police zahawmna humhim turin mimalin tihtur an nei a, thuawih leh invawn fel fai lamah pawh tan la zel turin a chah a; a bika train, a bika enkawl an ni tih inhriat reng turin a ngen a. Law and Order ken kawh bakah Police Department hian school enkawl tha tak tak a nei a, chung zingah chuan First Battalion MAP English Medium School phei chuan matric result tha tak neiin a lawmpui thu a sawi a. Police Department ten chak zawk a hna an thawh theihnan infrastructure changtlung neih a pawimawh zia sawiin, sawrkar chuan hmalak a tum zel thu a sawi bawk a ni.

Pu John Neihlaia, IPS (IGP Headquarters) chu khual zahawm a ni a. Neitu chan changa thawk zel turin leh ram tana rawngbawltu ni zel turin leh, hna in a khaihhnawih thil ah tih tur tha zawk kan hriat te, midang tana khek lo a, mahniin a hma la zel turin a fuih a. Social Media hmanthiam leh sawrkar hnathawk ten an tih tur leh tih loh tur hre turin MAPA member te a chah bawk a ni.

MAPA 2nd General Assembly ah hian member inspector atanga constable thi mi 238 sunna hun hman a ni a, hruaitu hluite chawimawina neih a ni bawk a ni. He hun hi MAPA President Admn Inspr HC Sangzuala'n a kaihruai a, MAPA Vice President Inspr Kawlsailova chuan lawmthu sawiin he hun hi a khar a. Chawhnu lamah session dang neiin rorel leh hruaitu thlanna hun neih a ni ang.



Attachment

  • Loading attachment...