556/2022-2023
Aizawl the 20th May, 2022 : Vawiin khan Health Minister Dr R.Lalthangliana chuan Mizoram Government Nursing Service Association (MGNSA) Biennial Conference 2022, Dawrpui Multipurpose Hall a neih chu khuallian niin a hmanpui.

Dr R.Lalthangliana chuan Nurse hna chu hna zahawm leh ropui, mi dangte tana rawngbawlna, service pawimawh leh danglam a ni, a ti. Hripui len vanglai, boruak hrehawm lai takin, rim takin hna an thawk a, an inpekna a ropui a, Mizoram mipui damlo mangang taka awm te enkawl hna nasa takin an thawk a, an hnathawh hlutzia leh tangkaizia a lang chiang hle, Minister chuan a ti a. Khati taka rim leh hah a thawktu Mizorama nurse te zingah COVID-19 hripui avanga thi tumah an awm lo chu a lawmawm tak meuh a, Pathian venhimna a ni, a ti. India ram hmun dang hospital lian tak taka thawk turin Mizo Nurse te an duh hle, Dr R.Lalthangliana chuan a ti a. Ama tawnhriat sawilangin phaia private hospital lian tak pakhat chuan Mizo Nurse te chu an thiamna piah lamah hmangaihna leh lainatna an ngaha vangin an duh hle, niin a sawi a. Amaherawhchu, Mizoram pawna nurse hnathawk zingah bansan ta an tam erawh pawi a ti, tih sawiin Health Minister chuan ram pawna hna thawk turin teirei peih a pawimawh a ni, a ti.

Thawktu indaihlohna chungchang sawiin Health Minister Dr.R.Lalthangliana chuan theihtawp chhuaha hma an lak mek thu a sawi a. Kum 2020 khan Health Department hnuaiah hna ruak 734 zet hnawh khah phalna sawrkarin a pek fel vek tawh hnuah COVID-19 hripuiin a nang a, sawrkarin inremchemna a kalpui tak avangin tihpuitlin theih a ni ta lo, a ti a. Hripui lengin ziaawm lam a pan tak hnu hian Health Sector lama hmachhawp an neih an tihhlawhtlin theih tak loh te chu bawhzui leh an tum thu a sawi a ni. Khuallian chuan an hmalakna thenkhat tarlangin Japan mi thiamte nena tangkawpa Cancer Superciality Hospital siam tum mek te, World Bank sum hmanga Health Sector hmasawnna tur thawh tum a nih thu te, nakum March thla ral hma a Mizoram chhunga Health Sub-Centre zawng zawng chu Health & Wellness Centre-a hlankai hman vek an tum thu te a sawi a ni.

MGNSA Conference hi kum hnih danah neih thin a ni a. Hripui leng avangin kum 2020 khan Conference an nei thei lo a. Kumin an Conference ah hian kum 2019 atanga 2022 chhunga an member pension ta mi 39 hnenah thlahna thilpek an hlan a. Hemi hun chhunga an member chatuan ram pan ta te sunna hun an hmang bawk. Programme hi nilenga neih niin chawhnu lamah rorel inkhawm leh hruaitu thar thlanna hun an hmang a. An agenda zingah thla 13 hlawh dil chungchang te, Tutor/PHNO/Ward Superintend te Group B gazetted level a hlankai tura hmalak chungchang te, Mizoram Nursing Service te tana State Award siam rawtna te, Nursing Directorate neih chungchang te, nurse hna lakna tur exam centre Lungleia siam chungchang te a tel a ni.

Chawhma programme-ah hian an President Pi C.Zopari leh Joint Director (Nursing) Pi Lalremmawii te pawhin thu an sawi a. Kum 10 chhung a zawna MGNSA OB nihna chelhtu Nl. Lalkapliani, Treasurer hnenah chawimawina an hlan bawk a ni.