Education Minister  Kawlkulh bialtu ni bawk Pu Rohluna chuan nimin (30.5.2017)  khan Kawlkulh Town Hall ah HSSLC Pass zirlai 16 te lawmpuina hun a hmanpui. 

Education Minister chuan zirlai hlawhtling te chu a lawmpui thu sawiin hlawhtlinna chang thei tura zirlaite kaihruaitu zirlai nu leh pa leh zirtirtute chu fakawm a tih thu a sawi bawk. Bialtu MLA chuan zirlai kalkhawm te chu fuihin pawl 12 pass chu duhtawk mai loa college level ah pawh tha thlah loa zir zel turin a chah a. Ruihtheih thil leh mipat hmeichhiatna laka fihlim tura fuihin zirlai leh mihring hlawhtling ni thei tura nun kawng dik zawh turin a chah a ni. Minister chuan Integrated Evaluation Scheme  (IES)  chungchang sawilangin IES hnuaia mark 20 zirtirtute kuta awm chu fair taka kalpui nise zirlai duhsaklo bik emaw uchuak taka duhsak bik neilo turin a chah a.  Hetih rual hian zirlai te pawh assignment,  attendance leh discipline ngai pawimawha zirtirtute leh mahni nu leh pa thu awih turin a chah a ni. 

Pawl 12 exam  hlawhtlingte lawmpui nan bialtu MLA chuan june thla atangin kawlkulh higher secondary school a mathematics zirtirtu hlawh tur chu MLA fund atangin a tumsak tur thu a sawi a,  hemi bakah hian Kawlkulh HSS in  tul anga a hman atan MLA fund atangin cheng nuai 2 a pe bawka,  zirlai hlawhtling te chu dictionary pe in school tin tan football a pe bawk a ni. 

Zirlai hlawhtlingte hi Kawlkulh Higher Secondary School zirlai niin, kumin result ah hian 100% an hlawhtling a,  zirlai 16 an exam a,  1st division ah mi 11, 2nd ah 2 leh 3rd ah mi 3 an ni. HSSLC result an neih tawh te chu Kum 2011 ah 100%, 2012 ah 100%, 2013 ah 80%, 2014 ah 100%, 2015 ah 100%, 2016 ah 94% leh 2017 ah 100% a ni. kawlkulh HSS hi private school niin, zirtirtute hlawh tur leh zirlai leh school mamawh hrang hrangte chu khawtlang leh zirlai nu leh pa ten an  thawhkhawm thin a.  English, mizo,  geography,  economics,  Education,  pol science leh history subject a zir theih a ni.

Attachment

  • Loading attachment...