Goodwill Foundation, Turnstone Global leh Amway India te bultuma mitdelte tana  din, Free Audio Digital leh Braille Library- chu vawiin chawhnu khan Special Blind School (Samaritan Association for the Blind) Durtlang-ah Pu R.Romawia, Higher and Technical Education Minister chuan a hawng.

Pu R.Romawia chuan  mi inphal ten chanhai zawkte tanpui tura an luangchhuak thin chu fakawm tiin anmahni avang chauhin khawvel hi chenna tlak a ni a ti a. Goodwill Foundation, Turnstone Global leh Amway te hnathawh chu fakawm tiin an kal zelna turah duhsakna a hlan nghal a ni. Blind School zirlaite chu beidawng lova huaisen taka hmalam pan zel tura fuihin hmanraw thar an dawn ang te chu chhawr thiama, hriatna lama tan la sauh sauh turin a chah a. Minister chuan mitdelte tana thawktu te chu fakin  hmangaihna thinlung pu chunga thawk zel turin a chah nghal bawk a ni. 

Special Blind School-a Braille Library hi Amway India leh Turnstone tangdunin East India a Braille Library an din panga zinga mi tur a ni a. Hetiang hi Kolkata, Bhubaneshwar, Siliguri leh  Agartala-ah te din a ni tawh a ni. Amway India hian National Project for the Blind hnuaiah India ram pumah Braille Library 31 a din tawh a. Braille Library ah hian lehkhabu pangngai chhiar ve thei lo mitdelte tan an tana tangkai thei tur chanchinbu, CD leh lehkhabu thahnem tak a awm a ni. 

The Smaritan Association for the Blind hian kum 2001 khan Special Blind School hi a din a. Mitdel te tan zirtirna leh awmna a thlawnin a siam sak a ni. Tunah hian Class I atanga Class X thleng zirna hawn a ni a. Zirna pangai bakah hian Vocational cource hrang hrang a hawng thin bawk a ni. 

He hun hi  Dr.C. Biakmawia, Adviser, Samaritan Association for the Blind-in a kaihruai a. Pu Christopher Lun, Secrectary Goodwill Foundatin; Pu Sumit Dasgupta, Eastern Region Manager, Turnstone Global leh Pi Sarbani Bhattacharya te pawhin thu an sawi a. Pu RK Vanlalringa, Principal, Special Blind School in lawmthu sawina  neiin he hun hi khar a ni.