New Delhi a cham mek Chief Minister Pu Lal Thanhawla chuan vawiin khan Union Home Minister Pu Rajnath Singh chu a Pisa ah a hmu a, Mizoram mamawh te an sawidun a, inkawmhona tha tak an nei a ni.

Chief Minister Pu Lal Thanhawla leh Union Home Minister Pu Rajnath Singh te hian Tripura Refugee Camp-a awm Bru chungchang te, Police tih changtlunna (Police Modernization) chungchang te leh Bangladesh leh Myanmar ramri depa Border Police Outpost siambelh chungchangte sawiin June thla laihawl velah Hmarchhak Chief Minister te Aizawl a an meeting tur chungchang pawh an sawi dun a. Chief Minister chuan 1997 a buaina a chhuah khan khatih lai a Bru te chu Mizoram chhuahsan lo turin a hrilh tih sawiin, tum tam tak Tripura Refugee Camp a awm Mizoram Bru te hi la let turin Road Map te siamin ruahmanna te siam a nih dante, chhungkaw tam tam an lo kir tawh thu te a hrilh a. Mahse ruahmanna siam tawh sa te chu pawm lovin thil thar leh demand an neih belh zel a, tun hnaia intihhmingchhiatna leh puhna te an siam thu a hrilh a. Mizoram Sawrkar chuan Mizoram Bru dik tak te chu Mizorama an kir leh ngei a duh a, mahse Refugee Camp-a awm Bru hruaitu thenkhat kawhmawhbawl an mahni hmasial ten, lo kir duhte hi an vau thin tih a sawi a. Tun hnaia thil thar an ngiat chu Mizoram Sawrkar in a ngaihtuah thei lo tih sawiin heng thil hi Sawrkar Laipuiin a pawm dawn anih chuan lo kir tawh chhungkua te pawh a pe ve tur a ni, a ti.

Police tihchangtlunna Modernization Of Police Forces chungchang an sawinaah police te chenna in tam tak chu a that tawh loh avangin Special Police Housing chu ngaihpawimawh sak turin Chief Minister chuan a ngen a. Mizoram chu ram pahnih in a karcheh avangin venhimna hi ngaituah bik a tul tih sawiin ramri depah Assam Rifles leh Border Security Force te nen Mizoram Police chuan thawhhona tha tak neiin hna an thawk a mahse Mizoram Police lamin Border Police Outpost mamawh zat ang an neih loh avangin harsatna an tawk fo thin a, chuvangin Border Police Outpost siambelh pawh ngaihpawimawh sak turin Home Minister hi a ngen a.  June ni 12 leh 13 a Aizawl a Hmarchhak Chief Minister te meeting tur chungchang pawh an sawi dun a, ramri chungchang leh Act East Policy chungchangte chu ngaihpawimawh anih tur thu Home Minister hian Chief Minister hi a hrilh a ni.

Nimin NEC Meeting a Minister of State for Home Pu Kiren Rijiju’n Hmarchhak tan IR Battalion 10 thar din a sawi chungchang pawh sawiin Chief Minister chuan IR Battalion pakhat tal chu Mizorama dah turin Union Home Minister hi a ngen bawk a ni.