Vawiin chawhma dar 10:  00 khan Pu S.Hiato Industries Minister chuan District Industries Centre, Conference Hall, Saiha-ah Mizo Academy of Letters leh Chhimtuipui Academy of Letters te tangkawpin an buatsaih "Thu leh hla pawimawhna" tih thupui hmanga Seminar chu Khuallian niin a hmanpui.
He Seminar hi Pu Lalthangmawia, Executive Member MAL chuan a kaihruaia Rev. Satinkapa chuan hunserh a hman hnu-ah Dr.Chawngkhuma Chawngthu, President CAL chuan kalkhawmte lawmna thu a sawi a. Khuallian chuan thu sawiin Chhimtuipui Academy of Letters te kut hnu Lehkhabu ziak engemaw zat a awm tawh thu sawiin lawmawm a tih thu a sawi a, thu leh hla lama hmasawn tur chuan kan zirna dinhmun te hi a pawimawh a Mara ram hi kan vannei em em a, kan literature bul min tan sak tute chu kan Missionary te an ni tiin ziak leh chhiar lamah ro hlu tak min phum sak a ni a ti bawk. Ziak mite taimakzia sawiin an hun leh tha tam tak sengin thu leh hla an phuahin an ziak a, lehkhabu ziak hian midangte hnenah thiltha tam tak tumruhna te taimakna te leh finna te mipuite hnenah a zirtir thei a ni, ati bawk. Ziak leh chhiar thiam tamlam tehna Literacy Rate ah Mizoram chu India State ah pathumna kan nih thu sawi langin hemi lamah hian nasa taka tan kan lak a tul a ni a ti  a, hriselna kawngah pawh Saiha District bik chu tan nasat an ngaih thu sawi langin zuk leh hmuam chungchang ah pawh kan hriselna tichhe thei thil anih avangin insum theih a pawimawh thu a sawi lang bawk. Thalaite HIV leh AIDS laka an fihlim theih nan fimkhur tura zirtir tam a pawimawh thu a sawi a, NLUP chungchang sawi langin sawrkar Flagship Programme anih ang ngeia a hlawhtlin theih nan theihtawp chhuaha a bawhzui hna thawhpui turin kalkhawm te chu a sawm bawk a ni.

He Seminar hi chawhma leh chawhnu hun a then ani a, chawhma lamah Pu C.Chhuanvawra, Vice President, MAL thuziak "Thu leh hla pawimawhna"tih thupui hmanga paper a present chu zirho ani a, chawhnu lamah "Mara Hmeichhiate Dinhmun" tih thupui hmanga Pi K. Pari, A&CO, MADC paper present chu zirho a ni bawk. Sawihona hun te neih zui nghal a ni  a, Pu F.Chhawnmanga, Vice President CAL chuan lawmthu sawina neiin he Seminar programme hi a titawp a ni.