Vawiin khan Kolasib Addl. D.C. Pu Zairemmawia hovin a office chamber ah NLUP Review meeting neih a ni a. Line Department hotuten he hunah hian District chhunga NLUP thawh khatna an kalpui dan sawi hovin a thawh hnihna atana inruahmanna kawng hrang hrangte an duang bawk a ni.a

Kolasib District chhungah hian NLUP thawh khatna atana tanpuina 1st instalment chu tluang takin sem zawh a ni a. A sem hnuhnung berin March ni 18 khan an insem zo thei a. Soil & Water Conservation, Industries leh AH & Vety Department te chu anmahni Department hnuaia beneficiary ngah bik leh anmahni target aia hei hi a san avangin 2nd Batch ah chuan Department dangah trade uar zawka thlan tir nise an ti a. Agriculture Department chu leilet leh Lo ram District in a neih ngah hle laia Beneficiary an neih tlem avangin 2nd batch ah hei pawh hi hriat nise, an ti bawk a ni.

NLUP thawh hnihna atana Trade thlan leh dan tur chungchang zau taka sawi ho a ni a. NLUP Manual in a tarlan dan anga a ram leilung leh pianhmang that dan leh sik leh sa te ena hlawm khata thlai inang chingtu dah ( Crop zoning ) pawh a theih ang chen chenah kalpui nise tiin NLUP Review meeting ah hian rel a ni bawk a. Hemi atan hian Kolasib District chhunga khaw thenkhat chu a ram mila thlai that theih dan enin an bithliah nghal a ni.

Kolasib District chhungah hian NLUP 1st Instalment pek hnu leh vawiin ni thlengin sawrkar duhdan kalha chhungkaw awmthei deuh diklo taka pawisa lo dawng leh an chunga action lak ngai tumah anla awm lo tih pawh he hunah hian sawilan a ni bawk a ni.

Tarlan tawh thin angin Kolasib District pumpuiah hian NLUP thawh khatnaah khan beneficiary 3814 an awm a ni.