Vawiin chawhnu khan  Law and Judicial, Transport leh Forest Department changtu Minister  Pu TJ Lalnuntluanga chuan Champhai khawpui luhna kawngpui Khankawn atanga khawchhung panna kawng a  endik a, Kanan veng leiminna hmun pawh tlawh nghalin Department hotute leh khawtlang hruaitute nen kawng siam dan tur leh leimin tawhlohna tura ven dan tur an enfiah nghal a ni.

Minister chuan inkalpawhna kawng chungchangah Sawrkarin mipuite harsatna hriain furpui thlen hma ngeiin National Highway 6 Aizawl atanga Champhai panna kawng chhe zual pui thawmthat hman ngei a tum thu leh hemi atan hian PWD department kaltlangin cheng vaibelchhe 10.5 dah a nih thu a sawi a. Champhai Kanan venga leiminna thin hmun pawh tlawhin fur ruahtui tam hunah la che leh mai thei anih avangin a lei nghetlo lai te paih faia leimin zel tur ven nana hmalak vat angaih thu a sawi a, amah tawiawmtu PWD leh DM&R hotute hnenah a hma thei ang bera DPR siam tur leh DM&R  Mitigation Fund te ngaihvena buaipui tura hrilhin a tulnaah tawiawm zel a tum thu  a sawi bawk a ni. Champhai South bialtu MLA chuan Champhai Kanan leh Dinthar panna kawng siamthat dan turte a en nghal bawk a ni.

Minister Pu TJ Lalnuntluanga hi Pu C.Lalruaia, Joint Director (Operation) DM &R, Pu Robin Lalrinawma, EE, PWD (Highways), Pu Abraham Beirazi Khithie SDO (Sadar) Champhai, Pu Vanlaldika, EE, PWD Champhai, Dr Lallawmkima, DIPRO Champhai, Chanchinbumite leh khawtlang hruaituten an tawiawm a ni.

Minsiter-in kawngpui leh leimin chungchanga hmalakna turte a enfiah zawh hnu hian Circuit House Conference Hall-ah sawrkar official leh khawtlang hruaitute nen an inkawm a ni.