Vawiin chawhnu khan  Law & Judicial, Parliamentary Affairs, Forest leh Transport Department changtu Minister Pu TJ Lalnuntluanga chuan Champhai khawpui leh a chhehvel khuate awlsam taka tlawhpawhna tur kawngpui Champhai Ring Road siam dan tur, Dumping ground leh Champhai Ruantlang kawngpui kama Truck Terminal sak turte a hmunah kalin a enfiah.

Pu TJ Lalnuntluanga chuan Champhai Ring Road leh Truck Terminal sak tur chu Sawrkarin a ngaihpawimawh thu leh tihfel ngaite zawh anih veleh hna tan nghal tum a ni, a ti a. Champhai Zotlang bula hnawm sawngbawlna  Dumping ground hmun tura lo ruahman chhin tawh chu mipui tana him tawklo leh khawpui thang zel tur ngaihtuah chung zela ennawn leh nise, khawtlang hruaitute leh sawrkar lam pawhin hemi chungchangah  inrawnkhawmna neih leh nise tha a tih thu a sawi bawk.

UD&PA kaltlanga Champhai Ring Road hmalakna hnuaia pakhat Tlangsam atanga Zotlang pawhtu kawng cheithatna tur hian  cheng nuai 240 a awm a ,  he kawngpui kilometre 4.3 a thui siam dan turte leh kawngpui tha tak siam anih theihna tura hmalak dan turte Sawrkar Official leh khawtlang hruaitute nen an enfiah a. Heng bakah hian Ruantlang a Truck Terminal changtlung tak sakna tur hmun Minister leh bialtu MLA nibawk chuan a tlawh  a. UD&PA Department kaltlanga Cheng nuai 500 vel senna tur Truck Terminal, a dung metre 120 leh avang metre 75 vel a  lian siam tum ani a, bungraw phur truck te dah lailawkna leh a enkawltute thlenna Hotel bakah mamawh dangte dah tum a ni. 

Vawiin chawhma lam khan Champhai South bialtu MLA hian a bial chhunga inkalpawhna kawng chhe zual pui te furpui hma ngeia siam anih theih dan tur Pu Vanlaldika, EE, Champhai Division chu Circuit House-ah a sawipui bawk a. Mipui chak khai lakna leh dam loh thulh pawha veivahna awlsam zawkna chu a ngaihpawimawh thu sawiin PWD department lamte pawhin lo ngaihven se a duh tih a sawi a ni. He hunah hian Pu  Vanlaldika chuan Champhai Kanan Venga Leimin thinna hmun venna tura DM&R hnuaia Mitigation Fund dilna tur DPR  siam Minister hi a hrilhfiah bawk a ni.