Tukin zing khan New Champhai hmuna Mini Sports Complex leh District Sports Committee Pisa sakna tur lung chu Pu TJ Lalnuntluanga, Law & Judicial, Parliamentary Affairs, Forest leh Transport Department changtu Minister chuan a phum.

He hun District Sports Committee President Pu Lallianpuia kaihhruaiah hian Minister chuan Sports discipline hrang hrang intelkhawmin infiamna kawnga  hmasawnna thlen tura hma an la chu fakawm a ti a. Champhai District-in  infiamna huangah theihna nasa tak a neih  thu leh tun dinhmunah pawh  volleyball leh discipline hrang hrangahte hlawhtlinna  neih thin anih thu sawiin,  hengte hi duhtawk mai lova thlen chin zel atanga hmasawn tum tur ani, a ti a. Mini Sports Complex leh District Sports Committee Pisa sak tur pawh anih dan ang tur taka sak anih theihna turin  Sawrkar lam atanga tih theih ang angte lo bawhzui a tum  thu  sawiin, Chief Minister ni mek hunlai atanga bultan tawh anih angin a kaihhhruaina hnuaiah puitlin ngei a beisei thu a sawi a ni.

Law & Judicial Minister chuan Sawrkarin infiamna tihhmasawn kawngah tanlak a tum thu sawiin, District level ang pawhin District Sports Council-te pawh hmathlira neih ani, a ti a. District Mini Sports Complex leh District Sports Committee Pisa sakna tur lung phum tak chu a lo puitlin hunah pawh  Champhai District mai bakah Mizoram puma infiammite tana rohlu leh tangkai tak  anih a, infiamna huanga khawvel hmaa zofate phochhuaktu anih ngei beisei chungin lung hi a phum a ni.

Pu Lalnunmawia, Senior Adviser, District Sports Committee chuan Mini Sports Complex leh Sports Committee Pisa sak anih theihna turin kum 2004 atanga hmalak tan anih thu a sawi a. Hmalak tawhna hrang hrangte tarlangin puitlin anih theihna  turin Sawrkar chungah beiseina sang tak an neih thu a sawi bawk.

Tukin  Sports hmasawnna ruhrel lung phumna hunah hian Sports disciplines hrang hrang aiawh, Media, khawtlang hruaitute leh sawrkar Official-te an tel a ni.