Vawiin khan Mizoram Tourism Service Association chuan Tourist Lodge, Chaltlangah Conference an hmang a. Tourism Minister Pu Robert Romawia Royte chu khuallian a ni. 

Pu Robert Romawia Royte chuan khawvel a changkang telh telh a, miin hlimna an zawng nasa tial tial a, Mizoram hi ram dang atanga lo kal khualzin ten hlimna an zawn hmuhna atan kan siam tur a ni, a ti. Mipui hip thei turin kut leh programme hlimawm buatsaih thin tul a tih thu sawiin Tourism Minister chuan Krismas hunpui laiah emaw kum tina thleng thei tur event changtlung taka siam dan tur ngaihtuah tul a ti a. Pawn lam atanga lo kal zin mite tana awlsamna siam sak turin online booking system te pawh Tourist Lodge ah neih tura tan lak tha a tih thu a sawi. Pu Robert Romawia Royte chuan khaw hrang hranga tourist lodge sawmpanga lai sak mek, scheme tawp tak avanga sak chhunzawm theih loh te chu tih nuna, hman theih tura sak puitlin dan zawn chu a ngaih pawimawh thu a sawi a. Institute of Hotel Management (IHM) Bung Bangla-a building sak tawh, a taka la function thei lo pawh changtlung taka function tir dan zawn a tum thu sawiin hei hi Mizoram tourism-in rahbi thar a kaina tur thil pawimawh nia a ngaih thu Minister chuan a sawi bawk.

He huna khual zahawm Tourism Secretary  Pi Esther Lal Ruatkimi pawhin thu sawiin MTSA Conference thupui chu “Hma lam panin” tih a nih angin hmasawn zel turin thawktute a fuih a. Service sector-a thawktu an nihna hre reng turin Tourism officer leh staff-te a chah a, anmahni dawrtu mipuite laka nelawm tak leh inhawng taka awm dan an thiam tur a ni, a ti a. Publicity pawh uar zawka kalpui tul a tih thu a sawi bawk.

MTSA Conference, an President Pu Saitluanga, Tourism Joint Director ni bawk kaihhruaiah hian Tourism Director Pu Biakthanmawia Pautu chuan kalkhawmte lawmna thu a sawi a. Joint Secretary Pi Irene Zohlimpuii Chongthu leh MTSA Secretary Pi Lalthakimi Pachuau ten thu an sawi a ni.

Tourism Department hian kum 2018 March thla atanga December thla thleng khan sawrkar tan cheng 2,42,84,091 an la lut tawh a ni.