Vawiin tlai khan Directorate of Sericulture buatsaihin Best NERTPS Implementing State Award lawmna leh Centre of Excellence Building hawnna hun Sericulture Conference Hall, Chaltlang-ah hman a ni. Award lawmna leh Building hawnnaah hian Sericulture Minister Dr. K.Beichhua chu Khuallian a ni a, Sericulture Department Secretary Pu Vanlalduhsaka chu Khual Zahawm a ni. Sericulture Director Pu Lalrozama chuan  kaihhruaina hun a hmang a ni.

Khuallian Dr. K.Beichhua chuan thu sawiin,   Mizoram tan Silk chu Pathian malsawmna hnar a ni thei a ni, a ti a. Department a thawktute inpekna chu fakawm a tiin, an inpekna chu ropui a ti bawk a ni. Kum khata Department-in Silk a tharchhuah Rs 260 lakh chuan duhthusam a phak lo a, Mizoram-in bungthar a kai theihnan thawktute tan la leh zual turin a ngen a. Silk lama hmalak a nih chhoh theih chuan sum leh pai thawhchhuah kawngah pawh chhungkaw tam tak a pui anga, ram economy a chawisang thei a ni, tiin a sawi a. Mizoram chu Silk Producing State niturin thawktute a sawmin a ngen bawk a ni.

Khuallian hian District tina Sericulture Officer, Silk Weavers, Farmers te hnenah lawmpuina thilpek a hlan bawk a ni.

Khual Zahawm Pu Vanlalduhsaka chuan thu sawiin, NERTPS Award chu Mark 100 scale-ah enin, tehkhawng chi 11-ah teh a ni, a ti a. India ram pumpuiah Tamil Nadu state chuan Mark 76 hmuin pakhatna a ni a, Mizoram chuan Mark 75 hmuin pahnihna a ni, a ti a. Mumal taka tehna neia Award hi pek a ni a, India hmarchhak zingah Mizoram chu Award dawng thei awmchhun a ni a, lawmman lak hi a tawpna nilo se, hmasawnna tur tam tak Sericulture-ah hian a awm a ni, tiin a sawi.

Centre of Excellence Building hi NERTPS bultuma sak a ni a, Rs 65 lakh senga sak a ni. Puantah zirna, mikhual thlen theihna leh choka te a awm a ni.

Kum 2015 atangin NERTPS  hi tan niin, NERTPS hnuaiah hian Project 24 a awm a. Project hlawm lian pahnih, Integrated Sericulture Development Project (ISP) leh Integrated Bivoltine Sericulture Development Project (IBSP) a then leh a ni a. IBSP hian Muga Development Project Eri Project leh Mulberry Development Project a huam a ni. NERTPS chhawrtu tam zawk hi Self Help Group an ni . NERTPS in a tum ber chu India Silk quality tha zawka thar chhuah a ni.