Mizoram Journalist Association (MJA) Champhai District chuan vawiin khan Annual Conference vawi 31-na MJA Champhai District Press Club, Bethel Veng, Champhaiah an nei a.  He hunah hian Pu Zonunsanga Khiangte, President, MJA Gen.Hqtrs chu khullian niin, Dr Lallawmkima DIPRO Champhai chu uaptu a ni.

Khuallian Pu Zonunsanga Khiangte chuan a zik chhuahna hmuna MJA Champhai District Annual Conference a hmanpui thei chu lawmawm a tih thu a sawi a. Chanchinbumite chu miten thuthar an hriatna hnar an nih avangin thil thleng tharte zirchiang thina, inzir reng tur an ni, a ti a. Nun dan mawi leh hawihhawmna Journalist te nuna hmuh a ni thin chuan tun hma zawng aia fimkhurna leh hmasawnna a thlen thu a sawi a.

Sawrkar hmalaknaa Chanchinbumite tana Project Site visit leh Press Tour neih thinte chu  hlawkthlak tak anih piah lamah  mipuite hrilhhriatna leh ram tana  hmasawnna ruhrel rotling  siamna tura tangkai tak a ni, a ti a.

MJA Champhai District leh Sawrkar Department lama Officer ten inpawhtlang taka  hnathawhte an inhrelhre thin chu fakawm a tih thu sawiin, hei hian Sawrkar kal sual tur a ven mai bakah mipuite hnenah Sawrkar hmalakna a puanzar thin thu a sawi a. Journalist-te chu thuchiang leh belhtlak mipuite hnena  chhawpchhuak thin tur leh  Social media  lamah pawh chanchinthar tam zawk  chhawpchhuak, a hman kawngah fimkhura mipui ti chi ai lo zawnga chetlak tum turin a fuih a.Sawrkar dept tin ten Advertisement pek chhuah lamah tanla thar leh se a duh thu pawh a sawi a.Sawrkarin SEDP hmanga Journalist te chawikan a tum chu  thlamuanawm a ti a, I&PR Department changtu Minister viak tha tak awm chu lawmawm a tih thu a sawi a. MJA President chuan Mizoram Journalist Retirement Scheme kalpui anih theihna tura hmalak dan turte a sawifiah a.
 
Khuallian chuan Mizoram Journalist te chu India rama inhlawm tha ber leh inpawhtlang tak an nih thu sawiin,  member te chu pawl dangte tana entawntlak tak nih tum theuh tura invawng turin a chah a. MJA Champhai District Annual Conference hlawhtling leh nuam tak neih ani chu   lawmawm a tih thu sawiin, an kalzelna turah duhsakna a hlan a ni, He hun uaptu Dr Lallawmkima DIPRO Champhai pawhin thusawiin, tunlai khawvel thangzelah media-in pawimawhna a nei thuk telh telh a, a hman dan pawh thiam a tul thu a sawi a. Chanchinbumite chu dikna , huaisenna leh rinawmna chawinunga  penchuak thin turin a chah a. Mipui siam sawrkarah fawng pawimawh tak an chelha vangin thil rintlak loh leh thu puarpawleng mai maiah innghat lo tura fuihin, mipui tam tak mit fukna an nihna chu inhre thar leh theuh se a duh thu a sawi a. Champhai District-ah Media te leh sawrkar thawhhona a that thu tarlangin, nikuma inthlan muanawm taka neih anih theihna tura chanchinbumite tawiawmnaah lawmthu sawiin, kumin kan hmalawka Lok Sabha inthlan awm turah pawh rinawm taka thawh tlan leh a beisei thu a sawi a. Sawrkarin Journalist-te hmakhua angai em em a,  I&PR Department kaltlangin hamthatna a siam sak thin a ni, a ti a. Ram leh hnam chawikan zelna kawnga thawhpuiah a sawm nghal bawk a ni.

Pu R.Lalhmangaihzuala, Vice President, MJA Hqtrs. pawhin thusawiin  Sawrkarin Mizoram Journalist Welfare Scheme kaltlangin Member damlo MR Bill Rs 80000 leh chhungte Rs 50000 thlenga a pek thu leh MJA member boralte Accredited Journalist tan Rs 150000 leh Non accredited tan Rs 100000 a ral thin thu a sawi a.

Journalist-te chu mite rawn an nih avangin hawihhawm tura chahin, iintuaithar reng tur leh awn lam nei lo turin a chah nghal a ni.

Thusawitu dang Pu C.Lalhnunpuia, MJA Champhai District chuan, ziaktute thil chhinchhiahna avangin khawvelin hun kal tawh kan hriat theih phah a, chumi kenkawh hna thawktu pakhat chu journalist te an ni tiin media te ram inrelbawlnaa a pawimawhna hi hriat thar leh a tul thu a sawi a. Journalism chu dik lo taka hlawkna zawnna atana hmang lo tura fimkhur a ngai, a ti a. Sorkarin MJA Champhai District ten Press Club tha tak a nei thei chu lawmthu sawiin, MJA member te chu mipui leh sorkar inkara awm an ni tih chiang tlat a, sorkar leh mipui inpawhna leh mipui phurrit phuhru tura tan la zel turin a sawm a. Thuthar rintlak leh belhchian dawl chhuah kawngah leh mipui hruai kawi thei thu laka fimkhur turin a chah a ni.

Vawiina MJA Champhai District Annual Conference chawhnu programme hi Pu R.Lalfakawma,Vice President, MJA Champhai District-in a kaihruai a.  Pu C.Lalrinsanga, Secretary, MJA Champhai Distrct-in  hnen atangin Secretary report ngaihthlak a ni a.

Chawhma lamah President, Pu C. Lalhnunpuia kaihhruaina hnuaiah rorelna neih a ni a.
Pu Lalrotluanga Ralte, Executive Member-in hunserh a hmnga. Pu C.Lalrinsanga, Secreatry leh Pu Lalnunsanga, Fin Secreaty-ten report an pe a ni.

Annual conference hi MJA General Hqrs atangin President bakah hian Pu R.Lalhmangaihzuala, Vice President leh Pu Lalhmachhuana, General Secretary ten an telpui a ni.