Vawiin chawhma khan Law and Judicial etc changtu  Minister leh Champhai South bialtu MLA nibawk Pu TJ Lalnuntluanga chuan a bial chhunga Higher Secondary School din thar Champhai South Higher Secondary School, Champhai Electric Veng a mi chu a hawng.

Pu TJ Lalnuntluanga chuan Champhaiin zirna bung thar Pathian kaihhruaina a a thleng thei chu lawmawm a tih thu leh Champhai South huamchhungah Higher Secondary School awm mumal loh hre renga School thar nei thei tura Managing Board te thahnemngaihna fakawm a tih thu a sawi a. Champhai South Higher Secondary School din thar chu  mamawhtu apiangte pan theih tur a ni a,  mipuite mamawh a phuhruk theih ngei a beisei thu sawiin, School thar dinna tur hmunhma leh building tha tak chhawm nghal mai theiha awm leh zel chuan remchanna thui tak a siam a ni, a ti a.  School thar anih angin hmabak hlenchhuah tur tam tak a la awm thu tarlangin, a enkawl leh kaihhruai kawngah tanrual angai a, Board hruaitute tawiawm thin turin khawtlang  mipuite a sawm a ni.

Champhai South bialtu MLA chuan School tharin Motto atana a hman, ‘For God and For Our Nation’ , Pathian leh kan ram tan tih chu sawizauin, Zirlaite chu engkimah Pathian dah hmasa ber a, ram leh hnam tana chhawrnahawm nih tum turin a fuih a,   Zirtirtu leh thawktu dangte pawh  ram tana mi chhenfakawm   chhertu nih tum turin a chah bawk a. School thar hawnna huna kalkhawmte chu Sawrkara therhlo beisei tum thinte bansana , mahni kutkawiha  ding tum turin a fuih a, nun dan dik pawma, suahsualna laka fimkhur fo thin turin a chah a ni.

Law Minister chuan zirlai naupangte chu ram leh hnam hmangaihna tak tak thinlung pu tura a chahin, “Ram leh hnam hmangaihna dik tak neite chuan sual tihduhna thinlung an pu theilo a ni”, a ti a. Hnam hmusit tawk chauha lehkha zir lo tur leh hnam  ziarang leh kalphungte chawinung fo thin zawk turin a chah a. Mahni zirlai theuhah theihtawp chhuah a, School dinchhan  ang  ngeia ram leh hnam tana mi tangkai tak nih tum theuh turin a chah bawk a. Champhai South Higher Secondary School thar chu  khua leh tui tha khawtlang tana chhawrtlak tak chherchhuaktu ni ngei thei tura duhsakna hlan chungin a hawng a ni.

Vawiin programme hi Pu R.Thangseia, Chairman, Managing Board-in a kaihruai a. Pu TBC Lallawmpuia, Secretary, Managing Board-in kalkhawmte inhmelhriattirna leh report a pe a. Pu T.Thanga, Treasurer, Managing Board-in lawmthu sawina neiin hun a khar a ni.
Champhai South Higher Secondary School hi Managing Board-te kaihhruainain  May Ni 5, 2019 atang khan Arts Stream-a zirtirna bul tan a ni a.  Subject paruk; English , Mizo, History, Political Sciences, Geography leh Education Subject zirna hawn niin, tun dinhmunah Zirtirtu 6, Non-Teaching Staff 1  leh Zirlai Class XI ah 22 leh Class XII-ah 29, avaiin 51 an awm mek a ni.

Attachment

  • Loading attachment...