Vawiin khan kolasib Diakkawn YMA hall ah ‘thalai leh khawl thlunzawm hmanga intodelh’ tih thupui hmangin Kolasib District a kut hnathawk ten khawmpui an hmang.

DAO Office buatsaih kut hnathawk inkhawmpui ah hian Agriculture Minister Pu C Lalrinsanga chu khuallian niin thu a sawi a, khuallian chuan Sawrkar tharah hian kut hnathawk te chu ngaih pawimawh an hlawh zual dawn ani tiin Sawrkar thar thupui ber chu Ram leh Hnam intodelh ani a ti a mahni tharchhuah ngeiin mahni choka a luahlum tur ani tih chu kalkhawm kut hnathawk ten chona ah hmang se a duh thu a sawi ani. Hnam intodelh ni tur chuan thawhrim leh tei rei peih a ngai a Mizoram chuan kawng hrang hrangin theihna anei ani tiin Kolasib District phei chu Potential nei tha em em ‘Rice Bowl of Mizoram’ tih theih tur khawp hiala theihna nei sang ani a, huan lo ram, leilet neitu kuthnathawk te hian kan theihna te a nihna ang taka pholang turin theihtawp kan chhuah theuh a ngai a, chumi kawnga puihna ngai zawng zawngah Sawrkar chu a inhawng reng a ni a ti. Kan leilet te chu hnam dang kutah dah mai lovin a neitute ngei hian Hnam thinlung pu chunga enkawl in kan Ram leilung ngei tharchhuah te chu Ram leilung fate hian hlawkpui ila , dinchhuah pui nan hmang ila chu chuan kan economy pawh nasa takin a pui dawn ani a ti.

Minister chuan kut hnathawkte mamawh intawm phuhruk nan SEDP hnuaiah hmalak ani chho dawn a, Society anga kal te pawh thil in tih hmuh chi tak ani chho dawn a, kut hnathawk ten an thil/thlai/sa tharchhuah/dehchhuah te dah that /khawl lailawk na tur Storage Facility te pawh tuai hnum chhoh zel ani dawn a, kan Ram leilung theihna te chu a hlawk zawng leh a tipung zawnga kut thlak a hun tawh ani a ti a, hemi kawngah Sawrkar chuan theihtawp a chhuah zel dawn a, kuthnathawkte tawiawmna leh thawhpuina an mamawh tur thu sawiin thalai te pawh hian Hnam thinlung puin Mizo ina thil kan tih ve theih hi chu Hnam dang kutah dah mai loin ngaituahna sen a hun tawh takzet a ni.

Ram leh Hnam thinlung pu chunga hma kan lak chhoh loh chuan tuna mi te hian tuar lo mah ila kan tu leh faten an la tuar dawn ani tih sawiin Pu C Lalrinsanga chuan Economy chauh nilo in kristianna atanga thlir pawh in tun anga kan kal a nih chuan Economy anga kan ngaituahna ten min hren beh a, min hnung khirh hun a la thleng palh thei a chu chuan Ram leh Hnam kan inrelbawlna bakah ei leh bar kan zawnna te hi a tlukchhiat a hlauhawm a, Sawrkar ina Ram leh Hnam intodelh nana hma a lak na kawngah thinlung leh tih takzeta thahwpui turin kalkhawm kut hnathawk te chu a  sawm a ni.

Khual zahawm FCS&CA Minister Pu K.Lalrinliana chuan Sawrkar in intodelhna a ngaih pawimawh thu tarlangin Mizo ten buh ani emaw thildang pawh nise Ram mamawh khawp kan tharchhuah theih phawt chuan Sawrkar in leisak a inhuam reng thu sawiin  Kolasib District chuan buhfai leh sangha ah te theihna sang tak a neih thu a tarlang a, heng te hi eizawnna tlak ani a, market a tha a, tih takzeta bei te tan chuan din chhuah puina tham ani a ti. Hetih lai hian kan dil, leilet leh huan lo ram enkawl tu a tan hnam dang kan chhawr nasa lutuk hian kan Ram tharchhuah chu hralh si lovin tam tak hnam dang kutah a luang ral a, chu chuan kan tharchhuah theihna te chu nasa takin min thlen phak tir lo fo ani tiin Ram leh Hnam intodelh ni tur chuan thawh hreh neilo Mizo thalai kan nih angai a, kan tharchhuah te ngei chuan kan  Ram market ah rorel sela kut hnathawkte bakah Ram leh hnam in nasa takin hma a sawn dawn ani a ti.

Kut hnathawkte inkhawmpui hi Pu J Rothanga DAO chuan a kaihruai a, Kolasib District chhunga khaw 19 atangin kuthnathawk 350 vel an kalkhawm a ni.