Vawiin chawhnu khan School Education Minister Pu Lalchhandama Ralte chuan Champhai Town Multipurpose Co-operative Society Limited te hmalakna a sak Champhai Higher Secondary School Building thar  Venthlang North a mi chu a hawng. Education Minster hi Pu Ramthanmawia, MLA East Tuipui; Dr ZR Thiamsanga, MLA Champhai North leh Pu C.Lalmuanpuia, MLA Aizawl North III ten an tawiawm a ni.

Education  Minister Pu Lalchhandama Ralte chuan  Champhai Town Multipurpose Co-operative Society Limited hmalakna hmanga Champhai Higher Secondary School din anih dan  leh sawrkar puihna tel lova kum 6 dawn kalpui ani chuan thinlung taka  hlimna a pek thu a sawi a.  Society hnuaiah   zirna bakah khawtlang tana a hmalakna hrang hrang kalpui  ani  chu  fakawm a tih thu leh  luanchhuahna an nei thei chuan chona nasa tak a pek thu a sawi a. Society dintute chu mi ropui  bik an ni  lo chunga khawpui mamawh zirchianga zirna In an din thei chuan an ngaihtuah thui zia a lantir a ni, a ti a.
Champhai North mipuite chu bialtu MLA   bial tana ngaihtuahna nasa taka seng thin an nei chu an vannei hle a a hriat thu a sawi a. 

Education Minister chuan sawrkar tharah  education leh health sector lamah bung thar kai tura tanlak tum anih thu leh  education bikah  Sawrkar  chauhin mawhphurhna a hlen thei lo a, NGO, khawtlang leh chhungkua nena tanrual angai a ni, a ti a.  Zirna tihhmasawnna turin MLA tin ten an area development fund atanga 10% tal an hman theihna tura ngen a tum thu a sawi a. Hmasawnna tluantling nei tur chuan mihring tihhmasawnna leh tuaihriamna ‘Human Resource  Development’  lam thlurbing hmasak angai a, a lailum a luah tir angai a,  anih loh chuan hmasawnna ke bai   mai ani thin, a ti a.  Pu Lalchhandam Ralte chuan Education hmun lo ram te vawn him angaih thu tarlangin, kan  ramin kawng dik a zawh theihna turin education hi a lailum kan luahtir a tul tak zet a, chumi thlen tir tur chuan Zoram mipuite tawiawmna a ngen a ni.  

Minister chuan  kum 6 dawn Sawrkar puihna tello  a Champhai Higher Secondary School kalpui a ni chu fakawm a ti a, kumin atangin   Lumpsum Grant-in-Aid pek an nih tawh thu sawiin, chumi hnuah performance, need base, seniority, quality a zirin dinhmun tha zawk a hlankai zel theih anih thu a sawi a. Zirtir hna thawk turin Trained teacher zel ruat anih tawh dawn thu a sawi bawk. Champhai Higher Secondary School chu Zirna hmunhma tha leh changtlung tak an neihte chhawr tangkaia   Champhai mai bakah Zoram pum tana fa duhawm tak, ram leh hnam hmangaihna thinlung pu mi chherchhuaktu ni thei turin duhsakna a hlan nghal a ni.

Education Minister hian Sikul mamawh Computer set, Laptop, Green board 2, Water filter, Sports goods te School thuneitute hnenah a hlan nghal a ni.

Vawiin programme Pu HS Vanlalfakzuala, Chairman CTM-PACS kaihhruaiah hian  Pu Ramthanmawia, East Tuipui bialtu MLA, Pu C.Lalmuanpuia, Aizawl North III MLA leh Dr ZR Thiamsanga, MLA Champhai North te pawhin lawmpuina leh fuihna thu an sawi bawk a. Pu Zirsangliana, Secretary, CTM-PACS in inhmelhriattirna leh report a pe a. School Principal Pu David Lalrammawia (L) sunna hu  neih a ni a. Pu R.Lalchhuanawma, Chairman, School Managing Board-in lawmthu sawina hmangin hun a khar a ni.

School Building thar hawn tak hi a dung feet 70 leh avang feet 24, Mizo pa chhiara chhawng 3 a ni a. A sak nan hian avaiin Rs 68,30,448 /- sen ani a,   ICDP atangin cheng nuai 5, BADP  atangin  cheng nuai 8 leh NEDP atangin cheng nuai 20 te dawn a ni a, heng bakah hian Society kaltlangin ram leina cheng nuai 9 tiamin Rs 44,30,448/- sen ral a ni.

Champhai Higher Secondary School hi 2013-2014 session atang khan Govt Champhai College Building-ah kalpui tan a ni a, tun dinhmunah  Zirtirtu 9, Non-Teaching Staff 2, Zirlai 73, Arts Stream-ah 60 leh Commerce-ah  13 an awm mek a. 2018-2019 HSSLC Examination-ah kahn Arts-ah 82.35 leh Commerce-ah 75.00 pass percentage neih a ni. 

Champhai Town Multipurpose Co-operative Society Limited hi kum 1994 a din niin, kum 2012 khan PACS neih a ni a. Tun dinhmunah hian member 150 vel an awm a. Dawr, School, PACS, Damdawi man tlawm zawrhna leh Vavu Project-te     Board felfai taka siamin an kalpui mek a. Indian Farmers Fertilizers Co-operative Limited hnen atangin kum 2017 khan chawimawina  an dawng bakah National Award for Excellency and Merit-2019, Society ICDS an dawng bawk a ni.

Education Minister hi Dr Naveen Aggarwal, IAS DC Champhai; Pu K.Laldingliana, Addl Director, School Education; Pu Lalhmachhuana, SPD, SSA; Pu Chawngthantluanga, Dy SPD, RMSA leh Education Department hotuten an tawiawm a ni.