2092/2023-2024

Champhai the 30th September, 2023 - Cheng nuaih 50 senga sak Champhai Tuipui Community Hall Cum Boxing Hall chu EF & CC Minister leh Bialtu MLA ni bawk Pu TJ Lalnuntluanga chuan vawiin khan a hawng.

Pu TJ Lalnuntluanga chuan Tuipui khua in Community Hall an neih lian lo tak chu a thara thlak a nih theihna turin hma an lak dan tarlangin a hmun hma tur hrang hrang an enkual hnuah Tuipui khelmual chu thlan fel a nih tak thu a sawi a, Pu Lalruatkima, RD Minister hnenah Fund an dil thu leh Rurban hnuaiah nuaih 40 a pek thu a sawi a, MLA Fund atangin nuaih 10 a pek belh thu sawi bawkin cheng nuaih 50 hmanga Hall sak a nih thu a sawi a, Boxing Hall chauh tura sak a nih laiin remchan zawkna avangin Badminton khelh theih turin a hall pawh sak zauh belh a nih thu a sawi a, Boxing ring pawh chah mek a nih thu leh rei lo te ah Hall ah dah fel theih a nih tur thu a sawi bawk.

Minister chuan Champhai leh a chhehvel tan Tuipui khua te inpek thinna chu theihnghilh chi a nih loh thu a sawi a, tui tla awm nikhuaah pawh Tuipui khua te Champhai in a chhuanvawr te an nih thu a sawi a. Tuipui khaw hmasawnna atana Sawrkarin theihtawp a chhuah thin thu tarlangin khawchhung inkal pawhna White Topping te, fehkawng nuam zawk siam te, Boxer te tana Hall tha sak te, tui connection siamsak te, Mobile Network tha leh Champhai leh Tuipui inkalpawhna kawngpui chhe tawh tak siam that hna te an thawh thu a sawi a, Tuipui khaw tana hmalakna tur an lo ruahman tawh te tihhlawhtlin a nih tawh thu a sawi a, Tomato an tharchhuah hralh zawh lova tawih awm thin te a awm tawh lohna tura ruahmanna siam niin an thlai thar te man man zawk leh tha zawka an hralhchhuah theih nan tomato sawngbawlna khawl sawrkar in a buatsaih sak thu a sawi.

Pu TJ Lalnuntluanga chua  Health Worker Tuipuiah dah tura hmalak ni mahse a thawk tur Health Worker zawn chawp an ngai thin chu buaithlak a tlin thu leh Tuipui khua ami ngei Health Worker an awm theihna tura zirna kawngah pawh hmasawn tum turin a chah a, Tuipui khua a lo nawm zel a, chenna tlak a nih zel theihna turin thalai ten zirna an uar a tul tih a sawi a, helam kawnga infuihna pawh uar zawka kalpui turin khawtlang hruaitute leh Kohhran hruaitute a chah bawk. Champhai leh Aizawl inkar kawng chhe tak chungchang Sawrkar Laipuiah thlenin kawngpui tha an neih theihna tura Chief Minister nen hma an lakna zarah kawngpui lian leh tha a awm tak thu a sawi a, kawngpui thar in Tuipui khua a hel lohna tura kawng hrang hranga hma an lak mek laiin hri alo len tak avanga hma an lakchhunzawm theih tak loh thu a sawi a, kawng kal dan tur ruahman lawk anga kaltir a nih tak thu a sawi a, kawng thar in hel mahse Tuipui khawtlang ten sawkar ah harsatna siam zawnga an awm lo chu an puitlin zia lanna a nih thu a sawi bawk. Kawngpui thar Tuipui atanga kalpawh theihna tura hmalak nise tia Tuipui khawtlang hruaitute nen an lo sawiho tawh angin kawng laihna tur sum dahfel tawh niin laih mai theih a nih tawh thu a sawi bawk.

Tuipui VCP Pu Rosangkima pawhin thu sawiin, Tuipui khua hi Mizoram in Boxing hmanga a hmelhriat ni mahse Boxing Hall an neih loh avangin boxing lamah pawh duhthu sam in hma an lak theih loh thu a sawi a, an harsatna te hriain Pu TJ Lalnuntluanga chuan Boxing Hall an neih theihna tura hma a laksak thu a sawi a, mobile signal an neih loh vanga hun rei tak chhung biak pawh hleih theih lova an awm hnuah Pu TJ Lalnuntluanga hmalaksakna zarah mobile network tha tak an neih tawh thu a sawi a, hei bakah hian kawng thar in a hel tak avangin kawng thar awlsam taka Tuipui in a pawh theihna turin ruahmanna a siam sak thu leh laih mai theih tura ruahmanna pawh siam tawh niin peihfel thawkhat a nih tawh thu sawiin an harsatna hrang hrangah hma a lakpuina zawng zawngah Bialtu MLA Pu TJ Lalnuntluanga chungah lawmthu a sawi a, memento a hlan a, pawl hrang hrang aiawh ten apr thi an awrhtir ve bawk.

He hun hi Pi Lalhruaitluangi, BDO Champhai chuan kaihruaiin Pu KT Dokima, Secretary MUP Tuipui chuan hunserh a hmang a, Pu Lalthakima, BDO Khawzawl hnen atangin Building sak dan report ngaihthlak a ni.

Tuipui Hall hawn thar hi SBMRM Fund hmanga sak niin cheng nuaih 40 leh MLA Fund cheng nuaih 10 senga sak a ni a, May ni 10, 2022 atanga sak niin December ni 29 ah sak zawh fel a ni a, remchan zawkna avangin vawiin ah hawn a ni a, a dung ft. 86 niin a vang ft. 36 leh a san zawng ft. 20 a sak a ni a, inthiarna 1 dah a ni bawk.