2109/2023-2024

Champhai the 2nd October - Vawiin khan Kelkang area MUP te chuan International Day of Older Persons pualin Kelkang Community Hall-ah Joint Meeting Programme an hmang a, Transport, EF&CC etc Minister leh bialtu MLA ni bawk Pu TJ Lalnuntluanga chuan khuallian niin a hmanpui.

Joint Meeting Programme, Pu T Sangkunga, President Kelkang Area MUP kaihhruaiah Minister Pu TJ Lalnuntluanga chuan thu sawiin Khawvel Pumpuia Kum Upa te Ni (International Day of Older Persons) puala program hlu tak buatsaihtu Kelkang area MUP-te fakawm a tih thu sawiin, he programme chhim tura kalkhawm zawng zawngte nun ti hlimtu leh kawng hrang hranga ti phur thartu anih ngei a beisei thu a sawi a. Kum Upate chu kan ram rohlu leh harsatna khirh tak tak kan hmachhawn changa khawtlang mipuite thlamuan thintu an nih thu sawiin, kum upate chu inti tar mai lova, khawtlang hmasawnna tura an ngaihtuahna lo seng chhunzawma,khawtlang mipuite finchhuah thin tu lo ni zel turin a ngenin a sawm a.  Kan mi hmasate leh upa te bul lo tan zarah Mizoram leh Champhai District pawhin hmasawnna tam tak kan hmu chho mek a ni tiin, kuthnathawktuten eizawnna ngelnghet zawk an neih theihnan Sawrkar chuan hma la mek zelin vawiin ngeiah pawh Horticulture Department hmalakna kaltlangin aieng sawngbawlna hmunpui Tlangsam Turmeric Processing Unit hawn a nih tur thu a sawi a. Heng hmalakna ah te hian Sawrkar lo tawiawm tura ngenin kawng hrang hranga hmalak puiah a sawm a ni.

Khawvel Pumpuia Kum Upa te Ni (International Day of Older Persons) pual hian hun hlimawm tak hman ho niin, zai hmanga Branch-te intihsiakna, sawm bikte intihsiakna leh solo te neih a ni a. Rev Lalthatluanga chuan "Inpumkhatna - Khawtlangah" tih Thupui hmangin thupui sawina hun a hmang a ni.