2206/2023-2024

Champhai the 7^th October, 2023 –North Eastern Council (NEC) sum cheng nuai 685 kaltlanga ruahman tur Sapthei sawngbawlna hmunpui ‘Passion Fruit Processing Unit’ New Champhai chu vawiin khan Champhai S AC bialtu MLA & EF&CC, Transport etc changtu Minister Pu TJ Lalnuntluanga chuan a lungphum a phum a ni.

Hemi puala hun tawi hman, Champhai DC Pu James Lalrinchhana kaihhruaiah Pu TJ Lalnuntluanga chuan Champhai kuthnathawktu, sapthei chingtuten an harsatna leh mamawhnate a hnena anlo thlen thin chu bawhzuiin ‘Passion Fruit Processing Unit’ Champhaia din tur hian Sawrkar Laipui Ministry of Food Processing te pawh tum engemawzat an dawr thu leh NEC hnuaiah tih hlawhtlin anih tak thu a sawi a. Chief Minister Pu Zoramthanga chuan Champhai District sapthei chingtute mamawhte a ngaih pawimawh takzet thu leh, he Project hi NEC project dilna zingah ngaih pawimawh (priority list) ah a dah thu sawiin, kuthnathawktute leh District mipuite aiawhin a chungah lawmthu a sawi a.

Khawvel changkang chho zelah kan ramngaw leh nungchate humhalh chunga hma kan lak zel a tul a ni tiin, kum tina lo kan neih kan bansan tial tial a, huan nghet kan uar chhoh zel a tul a, hei hi Sawrkar Policy pawimawh tak a ni, a ti a. ‘Passion Fruit Processing Unit’ chu hmasawnna daih rei leh tlo (sustainable development) kan neih theihna tura hmalakna pawimawh tak a nih thu sawiin, kan State leh District economy chawikanna tur atana project pawimawh tak a ni, a ti a. He project hmalakna kal mekah hian Mualkawi leh Ngur khua ah te Horticulture Department hmalaknain pioneer project-in kuthnathawktuten sapthei an chin chhoh mek thu sawiin, he project a hlawhtlin ngei theihnan kuthnathawktute chu lo inpuahchah CHHOtura sawmin, thawhho puiah a sawm a ni.

Pu R. Thangseia, Chairman, Champhai Passion Fruit Growers Society chuan Technical Report a pe a. ‘Creation of Passion Fruit Processing Unit at Cold Storage, New Champhai’ hi NEC cheng nuai 685 hmanga ruahman tur a ni a. Civil works atan hian cheng nuai 185 dah niin, sapthei sawngbawlna khawl hrang hrang leina atan cheng nuai 500 ruahman a ni.