No.3771/2020-2021

Dated Champhai, the 4th August, 2020: Law & Judicial Minister Pu T.J. Lalnuntluanga, Champhai South bialtu MLA ni bawk chuan vawiin khan Champhaia khawpui leh a chhehvela tunhnai ruahsur nasa avanga chhiatna thleng hrang hrangte a hmunah kalchilhin a enfiah a, district thuneitu leh line department hotute nen hmalak dan tur an ngaihtuahho a ni.

Pu T.J. Lalnuntluanga chuan khawtlang anga chhiat tawhna hrang hrangte hriatpuia a tul anga hmalak theih dan turte rawn enpui tuma kal anih thu a sawi a. Duh angin hmalak zung zung theih ni lo mahse tun leh tuna mamawh zualpui angte chu a theih ang zela pek an nih tur thu a sawi a. Ruahsur nasa vanga Champhai leh a chhehvela chhiattawhnate sawrkarin a hriatpui thu leh a tawrhpui thu sawiin, Sawrkar hotu lu ber Chief Minister pawhin a ngaihven renga, tanpuia chhawmdawlna pek a inhuam reng thu a sawi bawk.

Law & Judicial Minister chuan tuiluankawr siam that kawngah hmasawn angaih thu sawiin, chhiatna tam zawkte chu fimkhurna nena pumpelh theih a ni, a ti a. Mumal zawka khawpui chhung cheibawla ruahmanna kalpui a tul thu sawiin, Champhai khawpui tan Building regulation siam thar angaih zia hriain Champhai Master Plan duan mekah ngaipawimawh a ni, a ti bawk.

Law & Judicial Minister ho hian August Ni 1, 2020 zana thleng Champhai Kanan Veng thlanmual leimin enho a ni a, a ranglama tuiluankawr tha tak siam nghal nise tih niin, lei tawlh mai thei turte nakin zel thlenga ven anih theihna turin Gabion wall siam nise tih ani bawk. Thlanmual chim vang hian khawtlang hnatlangin thlan 49 chhiate hmun him zawkah sawnin, thlan lung 14 dang pawh an dah sawn a ni. Heng bakah hian Champhai North leh Champhai South huamchhung veng hrang hranga leiminte enfiah niin, Champhai leilet zawla Tuipui lui lianin a chim leilette tlawh ni bawkin, hmalak dan turte enfiah nghal a ni.

Chawhnu lamah Law & Judicial Minister hian Kelkang leh Dilkawn inkalpawhna kawng Kilometre 1.7 a thui, MLA Fund hmanga laih zauh hna thawh mek chu line department hotute leh khawtlang hruaitute nen an enfiah a. Pu T.J. Lalnuntluanga chuan khaw kar kawng inkalpawhna tha tak a awm theihna tura khawtlang hruaitute leh ram neitu ten rilru zau tak pu chunga hmalakna an tawiawm avangin an chungah lawmthu a sawi a ni.

Pu T.J. Lalnuntluanga hi Pi Maria C.T Zuali DC, Pu Mark Lalthanliana Addl DC, Pu George Lalthanngura DAO, Pu Laldingliana Hrahsel EE, I &WRD, Dr. Lallawmkima DIPRO, Pu Lalengliana Chhangte, DSP Hqtrs, Pu H.Vanlalthanga, OC, Champhaia Police Station, Pi Lalchhandami JE, PWD, Pu Lallianmawia JE, PWD, Pu Lalthankima JE, DRDA leh khawtlang hruaituten an tawiawm a ni.