No.3772/2020-2021

Hnahthial District atanga mi 5 Swab Sample, ZMC Laboratory-a RT-PCR khawl hmanga test result chu nizan khan tihchhuah niin heng zinga mi pakhat chu Covid-19 Positive tih hmuhchhuah a ni a, Govt Quarantine Facility awm lai niin Covid Care Centre-ah dah nghal a ni.

Hnahthial District chhunga Covid-19 vei hmuh hmasak ber hi kum 26 mi, Bangalore atanga lo haw niin te thlawhna hmangin Mizoram a rawn thleng a. Sorkar ruahmanna hnuaiah Ni 2.8.2020 (Pathianni) zing dar 7:00 khan Hnahthial rawn thlenpui a ni a, Govt Quarantine Facility-ah khung hran nghal a ni. Hemi ni (Pathianni) tlai hian a swab sample lak nghal niin nimin (3.8.2020) khan ZMC-ah a sample hi phurh phei niin nizan dar 10:00 pelh hnu khan a result hi hriat a ni a, Covid Care Centre - Hnahthial Damdawi In hlui building-ah sawn thlak nghal a ni. A awmna hlui Quarantine Facility pawh damdawi hmanga kah thianghlim nghal vek a ni bawk.

Hnahthial District Task Force Chairman leh District Bawrhsap ni bawk Pu Vanlalmawia chuan tukin khan Covid Care Centre hi tlawh nghalin mipuite chu chiai lova fimkhur tur leh Sorkar thupek te zawm tha turin a chah a, positive neih mek chu sorkar ruahman ang thlapa Hnahthial rawn phurh thlen a nih thu leh khunghran nghal a nih thu a sawi a, Containment zone pawh a ruahman fel nghal bawk

Hemi chungchangah hian Dr.Lalrengpuii Ralte Medical Officer, Hnahthial chuan “kan District-in positive kan neih chhun hi symptom la neilo a nih bakah thalai a nih bawk avangin a hlauhthawn awm lova, sorkar ruahmanna ang thlapin treatment pawh kan pe zui nghal a, mipui tan chiaina tur a awm lo a ni” tiin Mask vuah, Kut silfai leh Social distancing ngai pawimawh thar zel turin mipuite a chah bawk a ni

Hnahthial District Task Force member-te chu vawiin vek khan an Chairman leh District bawrhsap ni bawk Pu Vanlalmawia kaihhruaiin a Office-ah an thukhawm a, Covid-19 do kawnga hmalak zel dan tur thlir ho a ni a, Covid-19 avangin State dang atanga Hnahthial District chhunga rawn hawng hi tun dinhmunah mi 179 awm tawhin mi 161 ten Quarantine hun hmang zo tawhin mi 18 chu Quarantine mek an la ni tih tarlan a nih bakah vawiin atangin District Hospital Hnahthialah Rapid Antigen Test tih theih a nih tawh thu tarlan a ni a, Covid 19 do nana sum hmuh leh hmanna hrang hrang tarlan a ni bawk.