535/2022-2023
Champhai, the 18th May, 2022: Lei hipna (gravity scheme) hmanga Zokhawthar khua chawm tur tuilakna, Jal Jeevan Misson (JJM) 2020-2021 sum cheng nuai 423.40 (nuai zali sawmhnih pathum leh singli) senga siam, Zokhawthar Water Supply Scheme leh khawchhung in tina tui connection pekna Functional Household Tap Connection (FHTC) siam chu vawiin chawhnu dar 2:00 khan Environment Forest & Climate Change (EF&CC) Minister Pu T.J. Lalnuntluanga'n a hawng.

Zokhawthar Tourist Lodge Conference Hall-a tuilak hawnna inkhawm buatsaihah hian Khuallian, Pu T.J. Lalnuntluanga chuan thu sawiin, Zokhawthar khuain tuilakna tha tak a nei thar chu thinlung taka a lawmpui thu leh a hlawhtlinna atana theihtawp chhuaha hma laksaktu, Dy. Chief Minister, PHE Department changtu ni bawk Pu Tawnluia chungah te, PHE Department thawktute leh khawtlang mipuite chungah lawmthu a sawi a. Zokhawthara hmasawnna ruhrel pawimawh tak din a nih theihna tur hian PHE Department hotute leh thawktu dang ten a tak takin hna an thawk a, an rilru leh ngaihtuahna an seng nasa hle a ni, a ti a. An inpekna leh thawhrimna zara Zokhawthar khawtlangin hmasawnna rahbi thar a rap ta chu lawmawm a tih thu a tarlang bawk.

Tuilakna siam kawngah khawtlang mipuiten neitu rilru an put theih nana tihtur bituk tel a ni leh mipuiten tha an thawh chu lawmawm a tih thu sawiin, khawtlang mipuite chu neitu nihna rilru pu tlat tur leh a enkawlzui kawngah tha taka an tihtur leh mawhphurhnate hlen thin tur te, tuihna humhalh kawnga theihtawp chhuah zel tur te in a chah a. Kalkhawmte chu a eng zawnga ngaihtuahna pu tlat tur leh rilru leh ngaihtuahna hrisel nei turin a fuih bawk.

District Bawrhsap Pu James Lalrinchhana, Chairman, District Water & Sanitation Committee chuan Zokhawthar khuain tuilakna tha tak leh in tina tui herhhaw theih an nei ta chu a lawmpui thu a sawi a. Hei hian ei leh in chungchangah te thianghlimna leh faina chungchangah te hriselna leh eibar dehchhuah kawngah te, zirna thlengin a nghawng a ni, a ti a. Hripui leng kara PHE Department leh mipuiten thawhhona tha tak nen hma an la ho thin chu lawmawm a tih thu a sawi bawk. Bawrhsap chuan tuihnate vawnhim a nih zel theihna tura ramngaw humhalh a tul thu te, neitu rilru pu chunga hmasawnna rahbi thar an neih te chu duat taka enkawl chhunzawm turin a chah bawk.

Hawnna pual inkhawm buatsaih hi Er. C. Lalhmachhuana, SE, Champhai WATSAN Circle chuan a kaihruai a. Rev. Malsawmsangzuala'n hunserh a hmang a, Er. ZD Dengthuama, EE, Champhai WATSAN Division-in technical report a pe a. DFO Champhai Pu Lalduhthlana hnen atangin tuihna humhalh kawnga tulte ngaihthlak a ni bawk a. Zokhawthar VC Treasurer Pu C. Zarzoliana'n lawmthu sawiin hun a khar a ni.

Zokhawthar Water Supply Scheme hi January ni 2, 2021khan thawh tan a ni a, January ni 11, 2022 khan thawh zawh a ni. Tun thlengin tui connection hi in 645 ah pek a ni a. A siam nan hian Sawrkar laipuiin senso za zela 90 tumin State sawrkarin za zela 10 a tum thung a, a puitlin theih nan hian khawtlang mipuiten cheng nuai 4.23 (nuaili singhnih leh sangthum) hu tha an thawh bawk a ni.

Mi pakhatin nikhatah tui litre 55 thleng hmang anga chhutin kum 2050 a Zokhawthar mi cheng zat tura chhut chhin mi 4521 (tuna cheng zat atanga 32% a pung anga chhutin) te chawm zo tura duan a ni a. Tuilakna Khuailui lui atang hian chhuk zawnga tuilak niin, tuilakna thui zawng hi kilometre 21 a ni a. Tuilakna khuailui lui leh khaw lu-a tuizem lian dahte insanhleihna hi metre 280 a ni. Nitin darkar 24 chhung tui haw thei tur leh tui litre 2,48,655 (nuaihnih singli sangriat zaruk sawmnga leh panga) thlenga haw thei tura duan a ni. Tuilakna pipe hi 65 mm diameter GI (M) pipe niin, Aerator leh Horizontal Roughing Filtration (HRF) hmanga thlitfim a nih hnuah tuizem lian 2; litre 5,00,000 (nuainga) leh litre 3,00,000 (nuaithum) dawngah second khata litre 2.88 a chakin a inchhung lut a. Heta tang hian 100 mm GI pipe hmanga lakchhuah leh niin, Dead End/Tree System hmangin khawchhung in tinah tui connection (Functional Household Tap Connection) pek chhuah leh a ni.