534/2022-2023
Champhai, the 18th May, 2022: Champhai District chhung Khawbung khuaa Vawk engemawzat thite thih chhan chu African Swine Fever (ASF) a ni tih finfiah a nih avangin Dr. B.Lallawmsanga, District Animal Husbandry & Veterinary Officer (DAH&VO) Champhai chuan 'The Prevention and Control of Infectious & Contagious Disease in Animal Act 2009, Section 20 Sub-Section I in thuneihna a pek angin Khawbung khua chu vawiin May ni 18, 2022 atanga thuleh awm hma Vawk hrilenna hmun 'Infected Area' ah a puang.

African Swine Fever lenna hmun Infected Area a puan tak Khawbung khuaah hengte hi zawm ngei tur a ni.
1. Infected Area atanga Vawk lakchhuah emaw lakluh emaw phal a ni lo.
2. Vawk thi reng reng paih mai lovin, chinai (lime) nen thuk taka phum tur a ni.
3. Infected Area huamchhungah Vawk talh leh vawksa zawrh khap tlat a ni.

Vawiina puan belh tak nen hian tun dinhmunah Champhai District chhunga veng leh khua 17 te chu Vawk hrilenna hmun Infected Area-ah puan a ni a, veng leh khua 9 atanga sample lak result ngaihchan mek a ni bawk. ASF hrileng leh hrileng ni ngeia rinhlelh hian District chhung khua leh veng 26 te a luhchilh mek a ni.

A.H & Vety. Department chhinchhiah danin Champhai District-a ASF hrileng thawhhnihna, kumin February ni 4 atanga hmuhchhuah a nih hnuah vawiin May ni 18, 2022 thleng khan Vawk 1,854 an thi tling tawh a, fimkhur thuah Vawk 1,922 te suat an ni tawh a, Vawk thi leh fimkhur thua suat tawh zawng zawng belhkhawm zat chu 3,776 a tling tawh a ni. Vawiin bikah chuan Vawk 25 thiin, Vawk 44 suat an ni.