3709/2024-2025

Aizawl dated 7th January 2025: Vawiin khan Transport Minister Pu Vanlalhlana chu New Delhi-a in India ram state hrang hrang Transport Minister thutkhawmna leh 42nd Transport Development Council ah a tel a, Union Minister for Roads Transport and Highways, Pu Nitin Gadkari-a’n he thutkhawm hi a kaihhruai a ni.

Vawiina thutkhawm hi thuang hnih a then niin Session hmasa zawk ah hian sawrkar laipui policy thar, Driver Training Centres (DTC) tlangzarh a ni a. Lirthei fitness endikna tur Automated Testing Station (ATS) te, Accident tawkte tan sumfai hmang lo a inenkawlna tur, cashless treatment te, pilot project-a kalpui mek, lirthei vang a chetsualna a awma a mawhphurtu man an nih hma a an tlan bo thinna, 'hit and run' tuartu chhawmdawlna scheme te thlirhona neih a ni. Vehicle Scrapping Policy leh Registered Vehicle Scrapping Facility (RVSF) chungchang sawihona neih a ni bawk. Heng bak ah hian Union Minister hian IIT Madras kutchhuak app pathum – Sanjaya, Madras Matrix leh Field Perception Survey te a tlangzarh nghal a ni.

Session hnuhnung ah hian Transport Development Council an thukhawm a. He hunah hian India ram a Transport Association hrang hrang ten presentation an nei a. Mizoram Transport Minister Pu Vanlalhlana pawhin Union Minister hnen ah Automated Testing Station pakhat aia tam siam a nih theihna turin hmalak a tul thu a thlen a ni. Command and Control Centre March 2026 hnu lamah hman chhunzawm zelna tura Mizoramin harsatna a neihte a tarlang a. Passenger phur chi lirtheia vuah tur Vehicle Location Tracking Device and Panic Button (VLTD & EAS) chu lirthei neituten lei an harsat thu sawiin, a khawl lei nan hian sawrkar laipui chu subsidy 50% tal ngaihtuahsak turin a ngen bawk a ni.

Transport Minister hi Secretary Pu Zosangliana leh Director Er. R. Lalrammawia ten an tawiawm a ni.