3708/2024-2025
Dated Hnahthial, the 7th January, 2025: Vawiin khan Hnahthial District chhunga Khawhri khua chuan Haw Runpui hun buatsaihin South Tuipui Bialtu MLA, Pu Jeje Lalpekhlua chuan khuallian niin a hmanpui a. Dr. Lalrinawmi Ralte, Zakapa Award hmasa ber dawngtu leh awm chhun chuan Zakapa lim hawngin naktuk lamah pawh haw runpui hun hi buatsaih chhunzawm a ni dawn bawk a ni.
He huna khuallian, bialtu MLA, Pu Jeje Lalpekhlua chuan Lal huaisen Zakapa lalna tlang, Khawhri khaw haw runpui a hmanpui thei leh Zakapa lim hawn a ni thei ta chu lawmawm a tih thu sawiin khawtlang hruaitute, MLA kal chhuak ta te leh khawtlang mipuite inlungrualna fakawm a tih thu a sawi a. Khawtlang mipuite pawh an thil tihna kawng hrang hrangah Lal Zakapa ang bawkin huaisenna nen hma la a, hmeichhiate huaisen taka humhim thin tur leh khawtlang chu dikna leh rinawmna a tan tlat turin a fuih a. Hnahthial bial chhung khaw hrang hrangah pi leh pute sulhnu hmuh tur tam tak a awm chu vanneihthlak a tih thu sawiin hei hian kan bial ropui zia a pholang a ni a ti a. Pi leh pute sulhnu hrang hrang te ngaihlu a, humhalh zel turin kalkhawmte chu a chah nghal bawk a ni.
Pu Jeje Lalpekhlua chuan hlawhtlinna kawng hi a awlsam loh thu sawiin thi leh thau pawlha theih tawp chhuaha beih a ngai thin a ni a ti a. "Kan chawr chhuahna aiin engnge kan thlen chin tih hi a pawimawh zawk a, kan thlen tur lam pan a theihtawp kan chhuah thin a tul a ni." a ti bawk. Tun sawrkar hian sorkarna a chan tirh atangin beihna nasa tak tawk thin mah se Pathian hruaina zarah hmasawnna tam tak hmuh tur a awm a ni tiin Chief Minister leh Minister ten ram an kaihhruaina kawngah theihtawp an chhuah thin thu sawiin kuthnathawktute lamah an tang tlat a ni a ti bawk.
He hunah hian Dr. Lalrinawmi, Zakapa Award dawngtu chuan thu sawiin Pu HC. Thanchungnunga'n Zakapa Chanchin paper a present a. Khawhri khaw chhuak mi hmingthate chawimawina hun hmangin, zaithiam ten zaiin kalkhawmte an awih hnuah tlaiah khawtlang huapin ruai an theh nghal a ni.
