1909/2025-2026

Khawzawl, dated 14th October 2025: Vawiin chhun dar 12 ah khan Pu Vanlalhlana, Hon’ble Minister Transport Department, Govt. of Mizoram chuan Khawzawlah District Transport Office (DTO) hawnna programme-ah khuallian niin hun a hmang.

Minister Pu Vanlalhlana chuan Khawzawlah District Transport Office a ding ve ta hi lawmawm a tih thu a sawi a, a thlen theih nana thawk hah zawng zawngte chungah lawmthu a sawi. DTO chu a hming maia hawn niloin changtlung taka hawn a nih thu a sawi a, DTO trangkaina te sawiin Khawzawl mipui te'n a tangkai thei ang bera hmang turin a fuih bawk a ni. DTO hawnna chu Khawzawl district-a lirthei khalhtu te leh lirtheia hmanga ei zawng tu te tan hmasawnna a nih ngei a beisei a, tangkai taka mitinin an hman theih nan duhsakna a hlan a ni.

Transport Secretary Pu Zosangliana chu chairman niin he hun hi a kaihruai a, Director of Transport Er. R. Lalrammawia chuan report a pe bawk. Bawrhsap Pu K. Vanlalthiana chuan thu a sawi a, Transport Addl. Secretary Pu R. Lalchhanhima'n lawmthu sawiin hun a khar a ni.