1898/2022-2023

Kolasib: dated 13^th September 2022: Vawiin chawhnu khan DMS Conference Hall, District Hospital, Kolasibah Pu K.Lalrinliana, Minister of State, Food, Civil Supplies & Consumer Affairs Department, Kolasib Assembly constituency bialtu MLA ni bawk chuan 'Haemodialysis Unit' a hawng a. Pu John LT Sanga, Deputy Commissioner chuan he hun hi a kaihruai a ni.

Minister Pu K.Lalrinliana chuan dam lo enkawlna khawl pawimawh tak, Haemodialysis Unit hlawhtling tak a bun a nih theih nan a rilru leh ngaihtuahna sengtu, District Hospital-a thawktute chungah lawmthu a sawi a. MLA fund bak hmanraw lei ngai ruahman kawnga mi inpekna leh inphalna chu ropui a tih thu sawiin Kolasib district mipui zinga he khawl mamawhte tan malsawmna leh damna thlentu a nih ngei a beisei thu a sawi. Pu K.Lalrinliana chuan District Hospital thar, changtlung zawk sak a nih theih nan a sakna tur lungphum pawh phum thuai tur a ruahman a nih thu a sawi a. Kolasib district mipui bak ah district pawn lam ațangte pawh a damna beisei a Kolasib District Hospital-in pantu a nei țhin chu lawmawm a tih thu sawiin thawktute chu dam lote tan taksa leh rilru damna thlentu ni zel turin a chah bawk a ni.

Vawiin Haemodialysis Unit hawnna hun ah hian Pu John LT Sanga, Deputy Commissioner chuan hriselna neih pawimawh zia leh hmasawnna tehfung pawimawh tak a nih thu a sawi a. Dr. Lalrawngbawla Colney hnen ațangin Haemodialysis Unit chungchanga hriattur hrang hrangte ngaihthlak ni bawkin District Hospital-a thawktute leh Kolasib khawpui chhung a NGO hruaitute he hunah hian an tel a ni.

Report-a tarlan danin District Hospital, Kolasiba Haemodialysis Unit hi Sawrkar Facility hnuaia a pangana a ni a. Kolasib Assembly constituency bialtu MLA hmalakna hnuaia a building pawh sak țan niin tuna a khawl enkawltu tur Dialysis Technician pahnih pawh hi MLA fund ațanga chhawr an ni. RO system, Power Backup, Computer Set, Printer leh AC te hi Mizoram Health System Strengthening Project hnuai a ruahman niin a țul dangte chu District Medical Superintendent hmalakna ațanga ruahman a nih thu ngaihthlak a ni. Haemodialysis Unit District Hospital-ah hian Dialysis tihna khawl pathum a awm a. Heng khawl te hi Fairfax Foundation India kaltlangin ICICI Bank-te pek a ni.

Haemodialysis Building sak nan hian MLA fund cheng nuai 14 hman a ni a, MHSSP ațanga cheng nuai 7 chu RO system, Power Backup, Computer set, printer leh AC vuah nan te hman a ni bawk a ni.