1897/2022-2023
Lunglei the 13th September, 2022 – Lunglei District AIDS Prevention & Control Committee chu vawiin khan an Chairman Lunglei DC Pu Kulothungan A kaihhruaiin Lunglei DC Conference Hall-ah an thukhawm.

Meeting kaihruaitu Lunglei DC Pu Kulothungan A chuan Mizoram chu HIV/AIDS hluarna ber State a ni chu pawi a tih thu sawiin HIV/AIDS dona kawngah mitinten mawhphurna kan nei theuh a ni, a ti a. Tun hnaiah Lunglei District-ah ruihhlo inchiu avanga thalai HIV kai thar engemawzat an awm chu veiawm takzet a tih thu sawiin School Education Department leh College Principal-te nen tawngkawpin Lunglei District-a zirna in ah te HIV/AIDS awareness campaign nei thuai tura hmalak nghal anih tur thu a sawi a. AIDS Prevention & Control-a thawktute chu an mamawhte a hnena thlen vat tura chahin a tul anga sawrkar leh CST kaltlanga ngaihtuah pui nghal a tum thu a sawi a ni.

Meeting-ah hian HIV/AIDS kaihhnawih Lunglei District dinhmun tlangpui thlirho a ni a. Tun dinhmunah Lunglei District-ah antiretroviral therapy (ART) regular a la mek mi 1046 an awm a. Kumin January atanga August thleng khan mi 5267 (ICTC a test mi 3712 leh nu nau pai ICTC a test 1555) thisen test niin positive thar mi 138 (2.62%) hmuchhuah an ni.

Lunglei District AIDS Prevention & Control Committee hmalak tul hrang hrangte pawh ngaihtuah ho niin Sub Hqrs YMA te nen tangkawpa ruihhlo do kawnga hmalak, School Education Department leh College Principal-te nen tawngkawpa Lunglei District-a zirna in ah te HIV/AIDS awareness campaign neih, damdawi mamawhte sawrkar leh CSR kaltlanga ruahman, MSACS nen tangkawpa zau zawka mipui zirtirna Information, Education & Communication (IEC) kawnga hmalakna te kalpui tum niin member-te zingah mawhphurna insem nghal a ni.

Lunglei District AIDS Prevention & Control Committee chuan zau zawka hma a lak theihnan member lak luh belh ni se tih niin YMA, MHIP, MUP aiawhte bakah Lead Bank Manager leh kohhran hrang hrang leh kohhran thalai hruaitute pawh la lut tura hmalak nghal rel a ni.

Central YMA atanga ngenna dawn angin Mizoram State AIDS Control Society (MSACS) leh Central YMA tangkawp HIV/AIDS dona kawnga hmalakna ‘Zoram Harh Rawh Campaign’ chu Lunglei District-ah pawh November 15-19 chhung hian buatsaih tum a ni a. Mizo hnam hla leh Mizo hnam lam ah te intihsiakna neih tur niin intihsiakna hmunah hian HIV/AIDS awareness neih tur a ni a. December ni 1, 2022, World AIDS Day ah State Level intihsiakna neih a ni bawk ang. Lunglei Additional DC Pu Donny Lalruatsanga kaihhruai Organizing Committee in District Level intihsiakna hi an huaihawt dawn a ni.

Meeting-ah hian Lunglei CMO Dr LC Liana, Additional DC Pu Donny Lalruatsanga, District AIDS Control Officer Dr K. Lalhmachhuana, leh official dangte bakah Integrated Counselling and Testing Centre (ICTC) pathum – Christian Hospital Serkawn, Civil Hospital Lunglei leh Mobile ICTC atangin counsellor te an tel a. Pi Sobha Jose, Protection & WASH Coordinator, Adventist Development and Relief Agency, India pawh he meeting ah hian a tel a ni.