1896/2022-2023
Dated Serchhip, the 13th September, 2022: Pu Kaste Romalsawma, MPS, Serchhip Sub-Divisional Police Officer chuan mipuite hriattirna tichhuakin, district chhungah ruihhlo, rukruk leh pawi khawihna dangte dona kawnga hma an lak dan tur leh hemi kawngah mipuite hriattur hriattirna pawimawh tak a tichhuak. Thuchhuah tlangpui chu;

Serchhip district chhungah ruihhlo, a bikin No. 4 a tam hle a, rukrukna a tihluar hle. Chuvangin ruihhlo zuar hriate chuan rang taka Police emaw Excise hrilh hre thin turin a ngen a. An hming leh nihna thup sak a tul pawhin an thup sak dawn a ni.

Rukruk leh midang kutthlak tum report nachang kan hre thin a, a lawmawm hle. Chutihlaiin mi thil ruk sa man tlawm zawka lo lei sak erawh kan tim lo viau si niin a lang. Ruk a ni tih ringhlel chunga mi thilruk lo lei sak hi dan kalh a ni a, lungin tan leh pawisa chawi theihna a ni. Hetianga misual thil ruk lo lei sak tute hian Police hnenah “thil ruk a ni tih ka hre lova” tiin phat mar tum leh thin mah se, a tam ber chuan an rilruin thilruk an lei a ni tih an hre sa tho thin. Chuvangin Police lam chuan hetiang chhuanlam hi pawm sak tawh lova mi thil ruk lo lei saktute hi Court lama thawn zel tha berin a hre tawh a ni.

Gas bur te, tui meter te, silai te leh thil dang, Company emaw sawrkar thu lova lei leh hralh thiang lo bungrua a awm tih chu mitin hriat saa ngaih a ni a, chutiang lo leitute chuan dan an pawisa lova, a titute chu man nghal zel an ni ang.

Ruihtheih thil tih chingten bungrua a man pangai aia tlawm lutuka an zawrh lo leitute pawh thil ruk an lo lei a nih chuan an thil lei chhuhsak bakah anmahni pawh man nghal zel an ni ang. Hei hian huan thlai rah te, dil sangha te leh lo lam atanga tharchhuah thilte pawh a huam vek a ni.