408/2022-2023
Kolasib dated 5th May 2022: Vawiin chawhnu khan Pu K.Lalrinliana, Minister of State for Food, Civil Supplies & Consumer Affairs Department chuan Bairabi North YMA Hall-ah 'Save Tlawng Lui Project' kharna hun a hmanpui.

Pu K.Lalrinliana, Minister chuan Mizoram nunna hnar ang hial a ngaih theih, kan tui lakna ber Tlawng lui chhanchhuah a țul zia inzirtirna leh mipui nawlpui inkaihharh nana mi inpe tak tak ten 'Save Tlawng Lui Project' an kalpui chu lawmawm a tih thu sawiin hei hian hmasawnna duhawm tak a thlen phah ngei a beisei thu a sawi. Tui indaihlohna thleng mek chu ngaih pawimawh a, lui dung a thing leh nungcha humhalh leh tui thianghlim nei tur a kan bawlhhlawh sawngbawlna kawngahte ngaihtuahna thar put a țul thu Minister chuan sawiin Hydel Project tuikhuah kam a lo neih tum țalh awm țhin te hian tui hna a tih chhiat țhin thu a sawi bawk a ni. Tun hun a ram leilung hausakna humhalh duhna thinlung nena mi inpete penchhuahna hian mipui thinlungah a țha lam zawngin thui takin awmzia a neih phah ngei a beisei thu a sawi bawk a ni.

'Save Tlawng Lui Project' hnuai a Tlawng lui zawh chhuaktu Pu Romalsawma chuan Mizoram leilung hausakna chereu mek chhanchhuah nan leh ram ngaw neih belh nan penchhuah a hun tawh tak zet thu sawiin hemi kawnga hma la tur hian mitin an pawimawh thu a sawi.

He hunah hian Joint YMA, Bairabi, Village Council, Bairabi aiawh ațangte leh Pi Margaret Lalramchhani, IFS, DFO, Kolasib, Dr.F.Lalbiakmawia, Assistant Hydrogeologist, PHED leh Pi Ramthanzauvi, Councillor-te hnen ațangin tui hna humhalh pawimawh zia ngaihthlak a ni a. Pu R.Lallawmsanga, Secretary, Management Team, Save Tlawng lui Project hnen atangin report ngaihthlak a ni bawk.

'Save Tlawng Lui Project' hi ni 19 April 2022 khan kalpui țan niin Zotrek, East India Campers leh Mission Vengthlang Adventure Club-ten a țul angin an buaipui a. Zobawk, Mausen kai ațanga Tlawng lui hi zawh țan niin ni 5, May 2022 hian Bairabi hi an lo zawh thleng a ni.