407/2022-2023
Mamit 5th May, 2022 : Vawiin khan Chhimveng YMA Hall, Mamit-ah SEDP 2022-2023 hnuaia Vaimim, Bekang leh Fu chingtute tan training neih a ni a, Pu Lalnunhlua, District Bawrhsap chuan khuallian niin training hawnna thu a sawi.

District Bawrhsap chuan Central Sawrkar leh State Sawrkar atangin scheme tha tak tak mipuite khaichhuahna tur duan thin a ni a, a dawngtu mipui te'n kan zir loh chuan heng scheme te hi a hlawhtling zo thin lo a ni a ti. SEDP hnuaia tanpuina dawng tura thlanchhuahte chu an vanneih thusawiin, scheme in a tum ang ngeia hlawhtlinpui tum turin a chah a, thahnemngai leh mahni inpekna nena hmala tur leh mithiam zawkte zirtirna uluk taka ngaithla turin kalkhawmte a chah bawk.

Vawiin training Technical Session-ah hian Dr. Vanlalhruaia Hnamte, Sr. Scientist & Head. KVK Lengpui chuan Vaimim, Bekang leh Fu chin danah zirtirna a pe a. Dr. Rebecca Lalmuanpuii, Subject Matter Specialist, KVK Lengpui pawhin Vaimim, Bekang leh Fu tichhe theitu natna hrik leh a invenna chungchangah zirtirna pe-in Vaimim bikah a eichhetu Fall Army Worm ( FAW) chungchangah zirtirna a lem nen an pe a ni.

Vawiin training programme hi Pu Zokhuma Varte, DAO, Mamit chuan kaihruaiin Pu C. Lalsanglura, ADAO, Mamit chuan lawmthu sawina a nei a, Training-ah hian SEDP dawng tura thlanchhuah Mamit leh Damdiai khua a mite an tel a ni.