1374/2022-2023

Aizawl, 27th July, 2022 : Government J. Thankima College chuan vawiin chawhma dar 10:00 AM khan Vanapa Hall-ah Kal Tharte Lawmna (Freshers' Social) leh Music Video tlangzarh inkhawm hun an hmang a. Pu Robert Romawia Royte, Minister i/c Sports and Youth Services, ICT etc., chuan he hun hi hmanpuiin university examination-a zirlai titha te hnenah College buatsaih lawmpuina thuziak leh pawisa a hlan bakah music video a tlangzarh a, zirlaite zinga infiamna lama ram pum huapa medal la te hnenah chawimawina thuziak a hlan bawk. 

Kal tharte pual inkhawma khuallian Pu Robert Romawia Royte chuan zirna (Education) hi retheite tana dinchhuahna kawng tuma dan theih loh a ni. Mizo zinga mihlawhtling te hi harsatna paltlangtute an ni a, retheihnain a hneh loh an lo ni. Khawvel hmasawnnain khawsak phung a thlak danglam zel a, nunphung a danglam ta zel a, chu chuan harsatna pawh a thlen thin a, mahse heng harsatnate hi kan hamthatna zawk atan hman thiam kan tum tlat tur a ni,  tiin zirlaite a fuih a. College hmunhma tha an neih chu hmang tangkaia ram leh hnam rohlu ni tura College tihmasawn turin zirlaite leh zirtirtute chu a fuih bawk a ni; College zirna chu degree pe chhuak thei a nih tawh avangin class room bang pali piah lama mimal nun hmasawnna thleng phak zirna hi ngaih pawimawh a tul hle a ni, tiin a sawi a. Zirna kawngah chuan a lut lam aiin zirlai ten an zir chhuah a pawimawh tiin a sawi. 

Pu Robert-a chuan tunlai khawvela Information Communication hmasawnna hi thil dik kan hriatna min dal thei leh thil hriat tlak loh thlenga kan hriat theihna a nih avangin social media-a thu haw lam leh kal lam thlitfim thiam a pawimawh a. Kan thu chhiar leh thu post te hi fimkhur a ngai em em a, mi rilru nat theihna a ni em tih ngaihtuah hmasak fo a tul a ni tiin a sawi. 

Kal tharte pual inkhawmah hian Principal Prof. JV Nunchunga chuan GJTC a zirlai lut tharte lawmna thu a sawi a, College kal chu duh duh a khawsa tura zalenna kan neihna ni lovin zirna leh hmasawnna kawng zawh tura zalenna zawk a ni tiin a sawi.  Prof. JV Nunchunga chuan Govt. JTC ah hian zirlaite zingah tawng hrang hrang chi 21 hmang an awm mek chu lawmawm a tih thu a sawi a, Mizoram College zinga Management zirna awm chhun a nih thu leh College sum atangin Geography Subject zirna hawn a nih thu a sawi bawk. 

Kum 1992 a din Govt J. Thankima College hian NAAC assessment tum thumna nei turin an inbuatsaih mek a. Kuminah hian zirlai 1,050 an awm a, Principal leh zirtirtu 40 leh thawktu dang 12 an awm mek a ni.