Tukin zing khan Information & Public Relations Minister Pu Lalruatkima, Bialtu MLA ni bawk chuan Joint YMA Field, Vaivakawn bula sak mek Aizawl West Joint YMA Multipurpose Sports Complex chu a hmunah tlawhin, hmalak tawhna leh tul dangte a enpui. Minister Pu Lalruatkima hi Sports Minister Pu Robert Romawia Royte chuan a tawiawm a ni.

Information & Public Relations Minister Pu Lalruatkima chuan Jt. YMA Field, Vaivakawn chu Aizawl tlak lama khelmual pawimawh tak a nih thu sawiin, phul lem phah a nih loh vanga vaivut khuin Vaivakawn Bazar hmun leh a chhehvela awmte tan harsatna tenau a thlen thin chu sutkian thuai tha a tih thu a sawi a.

Sports Minister Pu Robert Romawia Royte chuan Jt.YMA Field, Vaivakawn chu thuamthat tul a tih thu leh tuna Multipurpose Hall sak mek pawh ruahmanna awmsa ti danglam lutuk lovin, Jt. YMA hruaitute duh dan angin Volleyball Gallery chu tih danglam nise, a ti a. Hnathawktu Lushai Engineers te chu theihtawp chhuaha tha tak leh chak taka hna thawk turin a chah bawk a ni.

Aizawl West Joint YMA Multipurpose Hall hi Kum 2017, March thla khan sak tan niin, a sak nan NEC atangin Nuai Rs. 921.12  ruahman a ni a. Kumin December hian zawh hman tum a ni. Sport and Youth Services Department chu Nodal Agency tan ruat an ni a, hna hi Lushai Engineers te’n an sa a. Hall hnuai ber chu riah theihna leh choka (kitchen) atana ruahman niin, a chhawng hnihna chu Gym leh Table Tennis Hall atan hman tura tih a ni. Lirthei dahna (motor parking) atan pawh ruahmanna siam a ni a, a chhawng chung ber chu Volleyball khelhna tura tih a ni ang. Aizawl West Joint YMA Multipurpose Sports Complex sirah hian Gallery, mi 200 bawr vel thutna tur pawh sak tan tum niin a hlui chu thiah mek a ni.

Minister Pu Lalruatkima leh Pu Robert Romawia Royte te hian Dinthar veng leh Kanan veng inkalpawhna Jt.YMA Field sir a mi pawh an en nghal a. Kawngpui zaua, lirthei dah nan pawha hman theih nghal tura siam nise an ti bawk a ni.

Minister-te hi Jt.YMA President Pu Vanlalzuiliana, Pu Laltlanthanga, Secretary, Sports Council, Pu R.Dawngliana, EE PWD Road North leh midangte’n an tawiawm a ni.